Karthika Deepam December 6th Episode Online

బుల్లితెర ప్రేక్షకుల్ని ఎంతగానో ఆకట్టుకుంటున్న ‘కార్తీకదీపం’ సీరియల్ 670 ఎపిసోడ్‌లను పూర్తి చేసుకుని.. 671 ఎపిసోడ్‌కి ఎంటర్ అయ్యింది. ఈ ఎపిసోడ్‌ హైలైట్స్ మీకోసం. తెలుగు ప్రేక్షకులను ఎంతగానో ఆకట్టుకుంటున్న‘కార్తీకదీపం’ సీరియల్ నేటి (డిసెంబర్ 6) రాత్రి ఎపిసోడ్‌లో ఏం జరగనుందో ‘సమయం’లో మీకోసం ముందుగానే.

గత ఎపిసోడ్‌లో ఏం జరిగిందంటే…

సౌర్య కావాలనే.. సరోజ మరిది లక్ష్మణ్ మామతో డాక్టర్ బాబుకి థ్యాంక్స్ చెప్పించాలనే వంకతో కార్తీక్ ఇంటికి వెళ్తుంది. థ్యాంక్స్ చెప్పిన లక్ష్మణ్‌ని వెళ్లి ఆటో కూర్చోమని.. కార్తీక్‌తో మాట్లాడుతుంది. కవర్‌లోంచి ఓ టీ షర్ట్ తీసి.. (దీప బర్త్ డేకి నాన్న వస్తాడని తెలిసి సౌర్య అప్పట్లో కార్తీక్‌ని మా నాన్న ఎలా ఉంటాడు అని అడిగి.. రెండు షర్ట్ తీసుకుని వస్తే.. ఒక లూజ్ షర్ట్ తీసుకుని.. ‘ఇది మీ నాన్నకు సరిగ్గా సరిపోతుంది రౌడీ’ అంటూ కావాలనే సెలెక్ట్ చేస్తాడు కార్తీక్) ఆ షర్ట్‌ని కార్తీక్‌కి చూపిస్తూ.. ‘ఇది మీకు గుర్తుందా డాక్టర్ బాబూ.. మా నాన్న వస్తాడని నేను కొన్నాను. ఈ సైజ్ సరిపోతుందని మీరే నాకు చెప్పారు. కానీ నాకు తెలిసిన వాళ్లు ఒకరు ‘మీ నాన్న అచ్చు డాక్టర్ బాబులా తెల్లగా సన్నగా ఉంటారు’ అని చెప్పారు. ఇప్పుడు మా నాన్న లావు అయ్యుంటాడు. డాక్టర్ బాబూ.. మా నాన్న ఎవరో చెప్పొద్దు. ఇది తీసుకెళ్లి మీ కూతురు ఇచ్చిందని చెప్పి ఆయన చేతికే ఇవ్వండి’ అంటూ కార్తీక్ చేతిలో ఆ టీ షర్ట్ పెట్టి అక్కడ నుంచి బాధగా వెళ్లిపోతుంది సౌర్య.

వంటలక్కని చూసి హిమ హ్యాపీ!

దీప ఆటోలో స్కూల్‌కి వెళ్తూ.. వారణాసికి ఆరాలు తీస్తుంది. ‘సౌర్య.. ఎందుకు కార్తీక్ ఇంటికి వెళ్లింది? అక్కడ ఏం మాట్లాడింది?’ ఇలా చాలా ప్రశ్నలు వేస్తుంది. కానీ వాటికి సమాధానాలు వారణాసి చెప్పలేకపోతాడు. ‘సౌర్య ఏం చేస్తున్నా.. ఏదీ నాకు తెలియనివ్వలేదు అక్కా.. కాకపోతే డాక్టర్ బాబు ఇంట్లోకి వెళ్తూ ఓ కవర్ తీసుకుని వెళ్లింది. తిరిగి వచ్చినప్పుడు ఆ కవర్ తీసుకుని రాలేదు అక్కా’ అంటాడు వారణాసి. దాంతో దీప టెన్షన్‌గా ‘అయితే ఈ విషయం గురించి అత్తయ్యని అడగాలి’ అనుకుంటుంది మనసులో. తర్వాత వారణాసి దీపను స్కూల్ దగ్గర దింపేసివెళ్తాడు. దీపని చూసిన హిమ నవ్వుతూ.. పరుగున దీప దగ్గరకు వచ్చి.. ‘వంటలక్కా ఇప్పుడే నీ గురించి అనుకుంటున్నా. నీకు హండ్రెడ్ ఇయర్స్ వంటలక్కా’ అంటుంది.

సౌర్య ఎంట్రీతో…

‘వద్దులేమ్మా ఇప్పటికే తొంబేయేళ్ల జీవితం చూసేశాను’ అంటుంది దీప కాస్త నిరుత్సాహంగా. దాంతో గతంలో కార్తీక్ కూడా అదే మాట అనడం గుర్తు చేసుకున్న హిమ.. మనసులో.. ‘వంటలక్క కూడా డాడీలానే బాధపడుతుంది పాపం’ అనుకుంటుంది. వెంటనే.. ‘నేను అడిగిన విషయం గురించి ఏం నిర్ణయం తీసుకున్నావని వంటలక్కని అడగాలి’ అని హిమ అడగాలనుకునే సమయంలో… అది గుర్తించిన దీప.. ‘అమ్మో ఇప్పుడు అడిగేస్తుందేమో’ అనుకుంటూ అటుగా వెళ్తున్న సౌర్యని ‘అత్తమ్మా అత్తమ్మా’ అని పిలుస్తుంది. దాంతో సౌర్య.. దీప, హిమల దగ్గరకు వస్తుంది. అయితే దీప కోపాన్ని గుర్తించిన సౌర్య.. మనసులో.. ‘అమ్మో వారణాసి నా గురించి ఏం చెప్పాడో ఏంటో?’ అనుకుంటుంది. సౌర్య రావడంతో ఆ విషయం అడగటం ఆపేస్తుంది హిమ.

కార్తీక్‌ని ఒప్పించే ప్రయత్నం

‘వంటలక్కా ఈ రోజు నువ్వూ మాతో తిందువుగానీ’ అని చెప్పి.. ‘సర్ఫైజ్ ఉంది.. అంతా కలిసి తిందాం’ అని సౌర్యతో కూడా చెప్పి.. కార్తీక్ కోసం వెయిట్ చేస్తుంది హిమ. కార్తీక్ రావడమే.. ‘ఇదిగోమ్మా.. బిర్యానీ.. తీసుకో. నువ్వు మీ ఫ్రెండ్స్ బాగా తినండి. నేను వెళ్తాను’ అంటాడు. ‘లేదు డాడీ.. నువ్వు రా.. మా ఫ్రెండ్స్‌తో కలిసి తిందువుగానీ’ అంటుంది. తీరా అక్కడ దీప, సౌర్యని చూసి షాక్ అవుతాడు కార్తీక్. దీప ఎదురుగానే.. సౌర్య, హిమ కలిసి.. బతిమలాడు, నేనూ తినను అని బెదిరించి.. మొత్తానికి అంతా కలిసి తినడానికి ఒప్పిస్తారు.

పిల్లలు హ్యాపీ

దీప కూడా ‘రండి డాక్టర్ బాబు పిల్లలు అంతగా అడుగుతున్నారు కదా. ఓ అరగంటకు ఏం అవుతుంది?’ అంటుంది. దాంతో కార్తీక్.. హిమ, సౌర్య, దీపలతో కలిసి కూర్చుంటాడు. బిర్యానీ తింటూ ఉంటాడు. దీప ఆ సీన్ చూసి కళ్లల్లో నీళ్లను (ఆనందబాష్పాలు) తుడుచుకుంటుంది. సౌర్య కూడా చాలా హ్యాపీగా ఫీల్ అవుతుంది. ఇంతలో హిమ.. ‘వంటలక్కా ఇందాక సౌర్య మా ఇంటికి వచ్చింది’ అని చెప్పడంతో సౌర్య, కార్తీక్ షాక్ అవుతారు. ‘హా.. డాక్టర్ బాబూ.. ఆ టీ షర్ట్ మాత్రం మా నాన్నకు ఇచ్చేయండి.. ఏంటో మీ నాన్న పేరు కార్తీక్కే. మా నాన్న పేరు కార్తీక్కే’ అంటూ సౌర్య వెటకారంగా మాట్లాడటంతో కార్తీక్‌కి పొరమారుతుంది. వెంటనే వాటర్ అందిస్తుంది దీప.

మౌనిత కాలింగ్!

ఇంతలో కార్తీక్‌కి మౌనిత కాల్ చేయడంతో.. ‘చెప్పు మౌనితా?’ అంటూ మాట్లాడతాడు. దాంతో హిమ, దీప, సౌర్యలకు కోపం వస్తుంది. దీప కావాలనే.. ‘డాక్టర్ బాబు ఇంకాస్త బిర్యానీ వేసుకోండి’ అంటూ అవతల మౌనితకు వినిపించేలా మాట్లాడుతుంది. ‘అర్థమైందిలే నువ్వు ఎక్కడున్నావో.. కలవాలి ఒకసారి రా’ అంటుంది మౌనిత కోపంగా. సరేనంటూ అక్కడనుంచి లేచిన కార్తీక్.. ‘నేను అర్జెంట్‌గా వెళ్లాలి’ అంటూ బయలుదేరతాడు. దాంతో సౌర్య కోపంగా.. ‘ఈమె ఇప్పుడే చేయాలా?’ అని విసుక్కుంటుంది. దాంతో హిమ కూడా ‘ఆమె ఎప్పుడూ అంతే’ అంటూ తిట్టుకుంటుంది.

రగిలిపోయిన మౌనిత

కార్తీక్ ఓ కేఫ్‌లో మౌనిత కోసం వెయిట్ చేస్తుంటాడు. మౌనిత రావడమే.. సీరియస్‌గా ఉంటుంది. ‘ఏంటి పిలిచావ్?’ అని కార్తీక్ అడగడంతో.. ఉన్నట్టుండి హాస్పెటల్ ఖాళీ చేయాలట. వానర్ 6 నెలల క్రితమే చెప్పాడు. నీకు ఈ విషయం చెప్పాను కూడా. కానీ నీ భార్యతో కలిసి ఉన్న మూడ్‌లో అప్పుడు మరిచిపోయావ్. వీలైనంత త్వరగా ఖాళీ చేయాలి. మంచి ఏరియాలో చూడు’ అంటుంది మౌనిత. ‘చూస్తాను. మరీ అవసరమైతే నా హాస్పెటల్‌లో ఓ వార్డ్‌లో..’ అంటూ చెబుతుంటాడు కార్తీక్. వెంటనే చేతులు ఎత్తి దన్నం పెట్టి.. ‘వద్దు బాబూ.. వద్దు. నీ హాస్పెటల్‌లో పెడితే ఓ చిన్న ఇల్లు పెట్టేసింది అంటారు. అంతా నాకు సెల్ఫ్ రెస్పెక్ట్ ఉంది. మీ అమ్మా, మీ నాన్న, నీ భార్య, నీ తమ్ముడు భార్య ఇలా అందరితో మాటలు పడలేను’ అంటూ ఓవర్ యాక్షన్ చేస్తుంది.

చురకలు వేస్తూ..

కార్తీక్ కాలర్ మీద ఉన్న ఉల్లిపాయ ముక్కను చూస్తూ.. ‘ఏంటీ కుటుంబ సమేతంగా భోజనం చేసినట్లు ఉన్నావ్?’ అంటూ వెటకారం చేస్తూ దాన్ని టిష్యూతో తుడుస్తుంది. కార్తీక్ ఇబ్బంది పడుతూ.. స్కూల్‌ల్లో జరిగిందంతా చెబుతాడు. అయితే మౌనిత అదంతా పట్టించుకోకుండా.. ‘ఈ హిమని నేను గోకుదామనుకుంటే.. అదేమో ఆ దీపని కార్తీక్‌కి దగ్గర చేయాలని చూస్తుంది. అసలు ఆ హిమ నిజం తెలిసి చేస్తుందా? లేక తెలియక చేస్తుందా?’ అనుకుంటూ ఉంటుంది. ‘నేను ఇంత చెబుతుంటే నువ్వేం మాట్లాడవేంటీ?’ అంటాడు కార్తీక్. ‘చూడు కార్తీక్.. హిమ అంటే చిన్న పిల్ల.. నీకు అన్నీ తెలుసు కదా? విడాకులు ఇస్తానంటూ మళ్లీ ఇవన్నీ ఏంటీ? అయినా నీకు అన్నీ తెలుసు కదా?’ అంటూ చురకలు వేసి వెళ్లిపోతుంది మౌనిత.

కమింగ్ అప్‌లో…

దీపను సౌర్య నిలదీస్తుంది. హిమ ఎవరు అమ్మా? హిమ వాళ్ల అమ్మ ఎవరమ్మా? ఆవిడని నువ్వు చూశావా?’ అంటూ ప్రశ్నలు మీద ప్రశ్నలు వేస్తుంది. దీప మొదట షాక్ అవుతుంది. తర్వాత కావాలనే.. ‘డాక్టర్ బాబు వాళ్ల భార్య కూతురు’ అంటూ దీప తప్పించుకునేందుకు తిక్క సమాధానాలు చెప్పినా సౌర్య మాత్రం ఈ విషయాన్ని అక్కడితో వదిలేలా లేదు. మరిన్ని వివరాలు తరువాయి భాగంలో చూద్దాం! కార్తీకదీపం కొనసాగుతోంది.