సీఎం గారు ‘మాస్టర్‌’కు అనుమతించండి

తమిళ సూపర్‌ స్టార్‌ విజయ్‌ హీరోగా తెరకెక్కిన ‘మాస్టర్‌’ చిత్రం ఈ కరోనా లాక్‌ డౌన్‌ లేకుండా ఉండి ఉంటే ఇప్పటి వరకు వచ్చేది. ఏడాదికి రెండు సినిమాలు చేసుకుంటూ దూసుకు పోతున్న విజయ్‌కి ఇది బ్రేక్‌ వేసింది. ఇప్పటికే లేట్‌ అయ్యిందని భావిస్తున్న మాస్టర్‌ మేకర్స్‌ థియేటర్లు ఎప్పుడైతే ఓపెన్‌ అవుతాయో అప్పుడు వెంటనే విడుదల చేయాలని భావిస్తున్నారు. కొన్ని రోజుల క్రితమే తమిళనాడు ప్రభుత్వం పోస్ట్‌ ప్రొడక్షన్‌ వర్క్‌కు అనుమతులు ఇవ్వడంతో దాదాపుగా ఆ వర్క్‌ కూడా పూర్తి చేశారు.

జులై నుండి థియేటర్ల ఓపెన్‌ ఖాయంగా కనిపిస్తుంది. ఈ నేపథ్యంలోనే జులై నెలలోనే మాస్టర్‌ను ప్రేక్షకుల ముందుకు తీసుకు రావాలని నిర్మాతలు భావిస్తున్నారు. ఈ సమయంలో నిర్మాతల మండలి మాజీ అధ్యక్షుడు కేయార్‌ తమిళనాడు సీఎంకు మాస్టర్‌ సినిమాకు అనుమతులు ఇవ్వొద్దు అంటూ కోరుతూ లేక రాయడం జరిగింది. మాస్టర్‌ సినిమా విడుదల అయితే థియేటర్లలో సామాజిక దూరం సాధ్యం కాదని, భారీ ఎత్తున విజయ్‌ ఫ్యాన్స్‌ సినిమాకు హాజరు అవుతారు.

అలా జరిగితే వైరస్‌ మరింత విజృంభిస్తుంది అంటూ ఆయన తన లేఖలో పేర్కొన్నాడు. ఈ విషయంలో అధికారుల నుండి ఎలాంటి స్పందన అయితే రాలేదు కాని విడుదల విషయంలో మాత్రం ఇబ్బందులు ఎదుర్కోవాల్సి రావచ్చు అనుకుంటున్నారు. అందుకే ముందస్తుగానే మాస్టర్‌ నిర్మాతలు సినిమా విడుదలకు అనుమతించాలంటూ సీఎంకు లేఖ రాశారు. థియేటర్లు ఓపెన్‌ అయిన వెంటనే మాస్టర్‌ను విడుదల చేయాలని భావిస్తున్నట్లుగా అందులో పేర్కొన్నారు.

థియేటర్లకు సూచించిన గైడ్‌ లైన్స్‌ పాటిస్తూ సామాజిక దూరంతోనే మాస్టర్‌ సినిమాను ప్రేక్షకులు చూసేలా చేస్తామంటూ అందులో నిర్మాతలు హామీ ఇవ్వడం జరిగింది. మరి ప్రభుత్వం నుండి మాస్టర్‌కు గ్రీన్‌ సిగ్నల్‌ వస్తుందా అనేది చూడాలి.