బాలీవుడ్‌ స్టార్ హీరో షారుక్ ఖాన్‌ నటించిన ‘జవాన్‌’ మరో రోజులో ప్రేక్షకుల ముందుకు రానుంది. అయితే ఈ చిత్రాన్ని కుటుంబంతో కలిసి తాను చూడాలనుకుంటున్నట్లు సూపర్ స్టార్ మహేశ్‌బాబు తాజాగా ట్వీట్ చేశారు. ఈ చిత్రం మంచి విజయం అందుకోవాలని ఆయన కోరుకున్నారు. అయితే దీనిపై షారుక్ స్పందించారు. మహేశ్‌తో కలిసి తాను కూడా సినిమాను ఎంజాయ్‌ చేయాలనుకుంటున్నట్లు బదులిచ్చారు.
“థ్యాంక్యూ సో మచ్‌ మై ఫ్రెండ్‌. ‘జవాన్‌’ నీకు నచ్చుతుందని భావిస్తున్నాను. నువ్వు ఎప్పుడు ఈ సినిమా చూడాలనుకుంటున్నావో చెప్పు.. నేనూ నీతో కలిసి సినిమాకు వస్తాను. నీకు, నీ కుటుంబానికి నా ప్రేమపూర్వక అభినందనలు” అంటూ షారుఖ్ ట్వీట్ చేశారు. ప్రస్తుతం ఈ ట్వీట్ నెట్టింట్లో వైరల్గా మారింది. వీరిద్దరి మధ్య జరిగిన ఈ సరదా సంభాషణ.. ఎక్స్ ట్విట్టర్లో సీని ప్రియుల దృష్టిని బాగా ఆకర్షిస్తోంది.
ఇకపోతే షారుఖ్ – మహేశ్‌ బాబు మధ్య మంచి అనుబంధం ఉన్న సంగతి తెలిసిందే. గతంలో ‘బ్రహ్మోత్సవం’ షూటింగ్ సమయంలో షారుఖ్ సెట్స్కు ప్రత్యేకంగా వెళ్లి మరీ మహేశ్‌ను కలిశారు. కాసేపు సరదాగా ముచ్చటించారు. ఈ ఫొటోలు కూడా అప్పట్లో నెట్టింట్లో తెగ వైరల్ అయ్యాయి.
ఇక, జవాన్‌ విషయానికి వస్తే,.. తమిళ దర్శకుడు అట్లీ – షారుఖ్ కాంబోలో తెరకెక్కిన యాక్షన్ ఎంటర్‌టైనర్‌ చిత్రమిది. ఈ సినిమాలో షారుఖ్ దాదాపు 7 గెటెప్స్‌లో కనిపించనున్నారు. రా ఆఫీసర్గా, పోలీస్ అధికారిగా, హైజాక్ చేసే వ్యక్తిలా, తండ్రి కొడుకులుగా.. రకరకాలుగా కనిపించనున్నారు. నయనతార ఇన్వెస్టిగేటివ్ ఆఫీసర్గా కనిపించనుంది. స్టార్ హీరోయిన్ దీపికా పదుకొణె అతిథి పాత్రలో యాక్షన్ సీన్స్లో కనిపించనుంది. ఇప్పటికే రిలీజైన ప్రచార చిత్రాలు కూడా సినిమాపై అంచనాలు భారీగానే పెంచాయి.
ఇంకా అందుతున్న తాజా సమాచారం ప్రకారం ఈ సినిమాలో సంజయ్‌ దత్‌, అల్లు అర్జున్, విజయ్‌ దళపతి కూడా గెస్ట్ రోల్స్ పోషించినట్లు తెలుస్తోంది. సినిమాలోని ఓ కీలక సీన్లో హిందీ వెర్షణ్లో సంజయ్‌ దత్‌ , తమిళ వెర్షన్‌లో అదే పాత్రను విజయ్‌ దళపతి, తెలుగులో అల్లు అర్జున్ పోషించనున్నట్లు కథనాలు వస్తున్నాయి.
