ఒకప్పుడు స్టార్స్‌ బుల్లి తెరను చాలా చిన్న చూపు చూసేవారు. టీవీల్లో కనిపించే వారికి పెద్దగా స్టార్‌డం ఉండేది కాదు. సినిమా స్టార్స్‌ టీవీల్లో కనిపించేందుకు అస్సలు ఒప్పుకునే వారు కాదు.పారితోషికం విషయంలో కూడా వెండి తెరకు.. బుల్లి తెరకు చాలా వ్యత్యాసం ఉండేది. కాని ఇప్పుడు పరిస్థితి పూర్తిగా రివర్స్‌ అయితే కాలేదు కాని అటు ఇటుగా మారింది. వెండి తెరపై కనిపిస్తే ఏ స్థాయిలో స్టార్‌డం వస్తుందో బుల్లి తెరపై కూడా అదే స్థాయిలో స్టార్‌డం వస్తుందని ఇప్పుడు అంతా ఒప్పుకుంటున్నారు.
గతంలో బుల్లి తెరను చిన్న చూపు చూసిన వారు చాలా మంది ఇప్పుడు వెండి తెరకంటే బుల్లి తెరనే ఎక్కువ ఇష్టపడుతున్నారు. బుల్లి తెరపై వచ్చే ఏ చిన్న అవకాశానైనా స్టార్స్‌ వదులుకోవడం లేదు.హీరోలు.. హీరోయిన్స్‌.. దర్శకులు ఇలా ప్రతి ఒక్కరు కూడా బుల్లి తెరపై కనిపించేందుకు ఆసక్తి చూపుతున్నారు. ఒక్క తెలుగులోనే కాకుండా పలు భాషలకు చెందిన స్టార్స్‌ కూడా బుల్లి తెరపై ఆసక్తి చూపిస్తున్నారు.
స్టార్స్‌ ఎక్కువగా రియాల్టీ షోలకు గెస్ట్‌ లుగా.. హోస్ట్‌ లుగా వ్యవహరిస్తున్నారు. ఎన్టీఆర్.. చిరంజీవి.. నాగార్జున.. నాని వంటి స్టార్స్‌ బుల్లి తెరపై సందడి చేశారు. ఇప్పుడు దర్శకుడు తరుణ్‌ భాస్కర్‌ కూడా బుల్లి తెరపై కనిపించేందుకు సిద్దం అయ్యాడు. ఈయన ఒక టాక్‌ షో తో ప్రేక్షకుల ముందుకు రాబోతున్నాడు. నీకు మాత్రమే చెప్తా అంటూ టాలీవుడ్‌ సెలబ్రెటీలను ఇంటర్వ్యూ చేసేందుకు రెడీ అయ్యాడు. రేపు ఈటీవీ ప్లస్‌ ఛానెల్‌ లో రాత్రి 9 గంటలకు ఈ టాక్‌ షో మొదటి ఎపిసోడ్‌ ప్రసారం కాబోతుంది. మరి తరుణ్‌ భాస్కర్‌ హోస్ట్‌గా ఆకట్టుకుంటాడో చూడాలి.
