గత ఎపిసోడ్‌లో ఏం జరిగిందంటే…
వెంటనే సౌందర్య.. తన ఫోన్ తీసుకుని.. దీప, సౌర్యల వీడియో చూపిస్తుంది. అందులో సౌర్య తాళం వేసి ఉన్న ఇంటి ముందు నిద్రలో ఉండగా.. దీప పరుగున వెళ్లి.. అత్తమ్మా.. అత్తమ్మా.. అంటూ సౌర్యని నిద్రలేపి.. గుండెలకు హత్తుకుని ఏడుస్తున్న సీన్ అది. సౌర్య నిజం తెలుసుకుని, దారిలో కార్తీక్‌ని కలుసుకుని అలసి ఆ గుమ్మం దగ్గరే పడుకుంది. దీప సౌర్య కోసం వెతికి వెతికి ఇంటికి వెళ్లేసరికి సౌర్య కనిపించడంతో బాధ, ఆనందం రెండూ కలగలిపిన ఎమోషన్ దీపది. అదే టైమ్‌కి సౌందర్య వెళ్లడంతో ఆ వీడియో తీసింది. అదే వీడియోని కార్తీక్‌కి చూపించింది. అది చూసిన కళ్లనిండా నీళ్లతో కార్తీక్ నిర్ఘాంతపోయి చూస్తూ ఉన్నాడు. సౌందర్య కళ్లు మాత్రం.. ‘దీనికి దోషివి నువ్వే’నని ప్రశ్నిస్తున్నాయి.
దీప సౌర్యల గురించి సౌందర్య ఆవేదన
‘రేయ్ ఆలోచించరా.. ఆ పిచ్చిది.. పాపం నాన్నా నాన్న అంటూ రోడ్ల మీద తిరుగుతుందిరా.. సమాధానం చెప్పలేక ఆ దీప పిచ్చిదైపోతుందిరా..’ అంటూ కార్తీక్‌తో తన బాధనంతా వెళ్లగక్కుతుంది. సౌందర్య మాటలను ఏ మాత్రం పట్టించుకోనట్లుగా చూస్తుంటాడు కార్తీక్. ‘నీకో కూతురుంది. రేపోమాపో నీ తమ్ముడికి వంశోద్దారకుడు రాబోతున్నాడు.. ఈ ఇంటికి నిజంగా దాని(దీప) ఉసురు తగలకూడదంటే..’ అంటుంది.
కార్తీక్ కఠిన సమాధానం
సౌందర్య చూపిస్తున్న వీడియోని చూడలేక పక్కకు జరిపేసి.. కార్తీక్ ముఖం పక్కు తిప్పుకుంటూ.. ‘ఎందుకు మమ్మీ ఇలాంటి బాధకరమైన వీడియోస్ చూపిస్తావ్..? ’ అంటాడు. దాంతో సౌందర్య బాధగా చూస్తూ.. ‘నువ్వు దేశోద్దారకుడివిరా.. సమాజం మెచ్చే గొప్ప వ్యక్తివి. కానీ ఇప్పుడు నీ భార్య బిడ్డలనే ఈ ఆవేశానికి ఆహుతి చేస్తున్నావ్‌రా’ అంటూ తిడుతుంది. ఆ మాటలకు అడ్డుపడుతూ.. ‘మమ్మీ.. నువ్వు ఆపు ప్లీజ్.. ఈ టైమ్ ఇదంతా మాట్లాడాలని నాకు లేదు. నవ్వు సైకాలజీ బాగా స్టడీ చేశావ్ మమ్మీ.. నువ్వు రాముడివిరా అంటూనే.. రాక్షసుడు కూడా ఉన్నాడురా అంటున్నావ్.. కానీ వాళ్లు మనకి వద్దు మమ్మీ.. నువ్వు దీని కోసం ఎక్కువగా ఆలోచించి మన మధ్య దూరం పెంచకు’ అంటాడు కఠినంగా.
కార్తీక్ చెంప చెల్లుమనిపించిన సౌందర్య
సౌందర్య మాటలకు అడ్డుపడ్డ కార్తీక్.. ‘స్టాపిట్ నిజంగా దాని ఉసురు మనింటికి శాపమై తగలకూదనుకుంటే.. ఆ తల్లీ బిడ్డల నీడ కూడా ఎప్పటికీ మన ఇంటి మీద పడకూడదు. చచ్చేదాకా వాళ్లిద్దరూ మళ్లీ నా కంట పడకూడదు’అంటూ అరుస్తాడు. దాంతో ఆవేశంలో సౌందర్య కార్తీక్ చెంప చెల్లుమనిపిస్తుంది.
హిమ ముందు దోషిలా సౌందర్య
అది చూసిన హిమ.. పరుగున అక్కడకు వచ్చి..కార్తీక్ చేయి పట్టుకుని.. సౌందర్య వైపు కోపంగా చూస్తుంది. ‘కొట్టావా నాన్నమ్మా? మా డాడీని కొట్టావా? ఎప్పుడూ మా డాడీని తిడుతూనే ఉంటావా? ప్రతి సారి ఇలానే మాటలు అంటూనే ఉంటావా?’ అంటూ అరుస్తుంది హిమ. సౌందర్య నిస్సహాయంగా బాధగా చూస్తూ ఉండిపోతుంది. ‘నువ్వు ఇంకా పడుకోలేదా అమ్మా?’ అని కార్తీక్ హిమని అడగగా.. ‘లేదు డాడీ.. నువ్వు తాగి వస్తావని నాన్నమ్మకి తెలుసు కదా.. ఇలాంటిదేదో జరుగుతుందనే నేను పడుకోలేదు’ అంటూ కార్తీక్‌ని లోపలికి తీసుకుని వెళ్తూ.. సౌందర్యవైపు ఓ దోషిని చూసినట్లుగా చూస్తుంది హిమ.
కార్తీక్ పరిస్థితి చూసి….
కార్తీక్ తాగిన మత్తులో నిద్రలో ఊగుతూ ఉంటాడు. అది చూస్తూ హిమ చాలా బాధ పడుతుంది. సౌందర్య కొట్టడం తలుచుకుని.. కార్తీక్ చెంప నిమురుతుంది. తర్వాత కార్తీక్ అన్న మాటలు తలుచుకుంటుంది. ‘అసలు నేను ఎవరికీ అక్కర్లేదా? అసలు నేను తిన్నానా ఉన్నానా అని కూడా చూడరా?’ అంటూ గతంలో కార్తీక్ కోపం తెచ్చుకున్న మాటలు తలుచుకుంటుంది. తర్వాత దీప మాటలు, కార్తీక్‌కి దీప అన్నం పెట్టిన సీన్స్ తలుచుకుంటుంది.
వంటలక్కకి నీకు పెళ్లి చేస్తాను డాడీ..
‘డాడీ ఇది ఇల్లు కాదు. స్కూల్. నాన్నమ్మ నిన్ను ఎప్పుడూ ఇబ్బంది పెడుతూనేే ఉంటుంది. అందుకే మనం ఇక్కడ ఉండొద్దు. వంటలక్క చాలా మంచిది. మీ పెళ్లి గురించి సౌర్యతో మాట్లాడి తప్పు చేశాను. ఈ సారి డైరెక్ట్‌గా వంటలక్కతోనే మాట్లాడతాాను. వంటలక్క ఒప్పుకుంటే చాలు కదా. ఎలాగైనా నీకు వంటలక్కకి పెళ్లి చేస్తాను.’ అంటూ మనసులో నిర్ణయించుకుంటుంది హిమ. సౌర్య, తనూ, కార్తీక్, దీప కలిసి ఉన్నట్లుగా ఊహించుకుంటుంది.
పాపం సౌందర్య హిమ అన్న మాటలతో..
సౌందర్య చాలా బాధగా కూర్చుని ఆలోచనలో పడుతుంది. ‘ఎందుకు నాన్నమ్మ? ఎందుకు? మా డాడీ అంటే నీకు ఎప్పుడూ ఇష్టం ఉండదు?’ అన్న హిమ మాటలు తలుచుకుని బాధపడుతుంది. కార్తీక్ జీవితం గురించి, సౌర్య వెటకారపు మాటల గురించి ఆలోచిస్తూ.. కూర్చుంటుంది.
భర్తతో తన బాధ పంచుకున్న సౌందర్య
సౌందర్య నిద్రపోకుండా ఆలోచించుకోవడం చూసిన ఆనందరావు.. మంచం మీద నుంచి పైకి లేచి.. ‘ఏం అయ్యింది?’ అని అడుగుతాడు. ‘కార్తీక్‌ని కొట్టాను.. హిమ చూసి నాదే తప్పు అనుకుంటూ కార్తీక్‌ని లోపలికి తీసుకుని వెళ్లిపోయిందండీ’ అంటుంది. ‘అయ్యో .. బాధపడుకులే.. కావాలని జరిగింది కదా?’ అంటూ నచ్చజెబుతాాడు. అయితే సౌందర్య మాత్రం టెన్షన్ పడుతుంది. ‘లేదండీ.. అటు చూస్తే ఆ రౌడీ(సౌర్య) నాతో చాలా కొత్తగా మాట్లాడుతోంది. ఇప్పుడు హిమ నన్ను దోషిని చేస్తుంది’ అంటూ తన మనసులోని బాధను చెప్పుకుంటుంది.
అమ్మానాన్నలను కలుపుతా : సౌర్య
సౌర్య ఆలోచనలో పడుతుంది. నాన్నకు అమ్మ కంటే నా మీదే కోపం ఎక్కువ కదా? మరి నన్ను కూడా చాలా ప్రేమగా చూస్తారేంటీ? అమ్మ కూడా చాలా మంచిదే కానీ నాన్న ఎందుకు అమ్మని దగ్గరకు రానీయట్లేదు.? నాన్న కూడా మంచివారే. వీళ్లని ఎలాగైనా కలపాలి. పరీక్షలకంటే ముఖ్యంగా అమ్మనాన్నలని కలపడమే ఇక నుంచి నా లక్ష్యం’ అనుకుంటుంది మనసులో.
సరోజా మరిదికి హార్ట్ఎటాక్
దీప దగ్గరకు సరోజ పరుగు వస్తుంది. ‘దీపా.. మా మరిది లక్ష్మణ్‌కి గుండె పోటు వచ్చిందట. నీ దగ్గర డబ్బు ఎంత ఉంటే అంత ఇవ్వు.. ఆస్పెటల్‌కి తీసుకుని వెళ్దాం..’ అంటుంది సరోజ. ‘అయ్యో అక్కా.. నా దగ్గర డబ్బులు లేదు.. ఉన్నదంతా ఊడ్చి.. మొన్నే చీటీ కట్టాను..’ అంటూ తన దగ్గర ఉన్న కొంత సొమ్ము తెచ్చి.. లెక్క పెడుతూ ఉంటుంది.
సౌర్య వెటకారం.. ఆపై హామీ
సరోజా, దీపల మాటలు విన్న సౌర్య.. మధ్యలో కలుగజేసుకుని.. ‘ఎందుకమ్మా? టెన్షన్? నాన్నమ్మా.. తాతయ్యా.. ఆదిత్య బాబాయ్ వీల్లదంతా మనం అడిగితే చాలా డబ్బులు ఇస్తారుగా..? కంగారు దేనికి?’ అంటూ వెటకారం చేస్తుంది. దీప షాకింగ్ చూస్తుంటే సరోజ టెన్షన్ పడుతుంది. ‘అయినా డాక్టర్ బాబు చాలా పెద్ద డాక్టర్ కదా అమ్మా.. గుండె నొప్పి అయితే ఆ హాస్పెటల్‌కి తీసుకుని వెళ్తే సరిపోతుంది కదా అమ్మా’ అంటూనే.. ‘సరోజక్యా.. లక్ష్మాణ్ బాబాయ్‌ని అటు డాక్టర్ బాబు హాస్పెటల్‌కి తీసుకొచ్చేయండి.. నేను మా అమ్మా ఇలా వచ్చేస్తాం’ అంటూ హామీ ఇస్తుంది.
ఇరకాటంలో దీప
‘దేవుడా ఈ సౌర్య ఏమో నన్ను ఇలా ఇరికించింది. ఇప్పుడు ఆ హాస్పెటల్‌కి వద్దంటే.. ఇది(సౌర్య) ఊరుకోదు. అక్కడికి వెళ్లాక ఆ డాక్టర్ బాబు ఊరుకోడు. వీళ్లిద్దరి మధ్య ఇలా ఇరుక్కున్నానా దేవుడా’ అంటూ టెన్షన్ పడుతుంది దీప. అయితే ఇటు సౌర్య, అటు హిమ ఒకేలాంటి నిర్ణయాలు తీసుకున్నారు. అదే ప్రయత్నంలోో ఉన్నారు. దాంతో కార్తీక్, దీపలు కలవాలనే ప్రేక్షకుల ఆశకు శుభం కార్డ్ పడనున్నట్లే. మరిన్ని వివరాలు తరువాయి భాగంలో చూద్దాం. కార్తీకదీపం కొనసాగుతోంది.
