బుల్లితెర ప్రేక్షకుల్ని ఎంతగానో ఆకట్టుకుంటున్న ‘కార్తీకదీపం’ సీరియల్ 672 ఎపిసోడ్‌లను పూర్తి చేసుకుని.. 673 ఎపిసోడ్‌కి ఎంటర్ అయ్యింది. తెలుగు ప్రేక్షకులను ఎంతగానో ఆకట్టుకుంటున్న‘కార్తీకదీపం’ సీరియల్ నేటి (డిసెంబర్ 9) రాత్రి ఎపిసోడ్‌లో ఏం జరగనుందో ‘సమయం’లో ముందుగానే మీకోసం.
గత ఎపిసోడ్‌లో ఏం జరిగిందంటే…
దీప, సౌర్యకు జడలు వేస్తూ.. ‘ఆడ పిల్లలు ఎంత జాగ్రత్తగా ఉండాలో తెలుసా? ఈ రోజుల్లో ఆడపిల్ల బయటికి వెళ్తుందంటే భయమేస్తుంది. నువ్వు ఇక నుంచి స్కూల్ ఇల్లు తప్పా.. ఆటోని అటు పోనీ.. ఇటు పోనీ.. అనడానికి వీళ్లేదు చెబుతున్నాను’ అంటూ వార్నింగ్ ఇస్తుంది. దాంతో సౌర్య ఆవేశంగా.. ‘వాడే(వారణాసి) చెబుతున్నాడా నీకు ఇవన్నీ?’ అంటూ రగిలిపోతుంది. వెంటనే దీప కోపంగా.. ‘వారణాసి చెబితేనే నాకు విషయాలు తెలుస్తాయా? అయినా నిన్న లక్ష్మణ్ మామని తీసుకుని ఆ ఇంటికి ఎందుకెళ్లావ్?’ అంటూ నిలదీస్తుంది. ఇంతలో వారణాసి రావడంతో సౌర్య కోపంగా వారణాసివైపు చూస్తూ ‘రా నాన్న రా’ అంటూ వెటకారం చేస్తుంది.
అక్కా చూడక్కా..!
‘నేనేం ఊరికే ఆ ఇంటికి వెళ్లలేదు. డాక్టర్ బాబుకి నాన్న ఎలా ఉంటాడో తెలుసు కదా. అందుకే డాక్టర్ బాబు చెప్పిన టీ షర్స్‌ని మా నాన్నకే ఇచ్చేయండి అని.. ఇచ్చి వచ్చాను. ఇస్తాడో లేక షర్ట్ బాగుందని ఉంచుకుంటాడో నాకు తెలీదు.’ అంటూ జరిగిందంతా చెబుతుంది సౌర్య. తర్వాత కూడా వారణాసి వైపు కోపంగా చూస్తూ ఉంటుంది. దాంతో వారణాసి భయంగా ముఖం పెట్టి ‘చూడక్కా.. మింగేసీలా చేస్తోంది’ అంటూ దీపకి సౌర్య మీద కంప్లైంట్ చేస్తాడు. ఇంతలో దీప మనసులో.. ‘నా కూతురు మంచి పనే చేసింది. ఎవరికి చేరాలో వాళ్లకే ఆ టీ షర్ట్ చేర్చింది’ అనుకుంటుంది. ఇంతలో వారణాసి.. ‘అక్కా.. ఈ రోజు ఆటోలో నువ్వు కూడా రావా? ప్లీజ్.. లేదంటే నా పనైపోతుంది’ అంటూ రిక్వస్ట్ చేయడంతో దీప కూడా కూరగాయలు బ్యాగ్ తీసుకుని బయలుదేరుతుంది.
బైక్ మీద కార్తీక్ హిమలు..
బైక్ మీద స్కూల్‌కి వెళ్తూ.. ‘డాడీ పైకి లేచి నిలబడనా?’ అంటుంది హిమ. ‘వద్దమ్మా పడిపోతావ్’ అంటూ జాగ్రత్తలు చెబుతాడు. ‘డాడీ రైట్‌కి పోనీ డాడీ.. ఈ బస్తీలో ఆపు’ అంటూ అక్కడ ఆపించి.. ‘చూడు డాడీ వీళ్లకు చలి కాలంలో కప్పుకోవడానికి ఏం ఉండవు కదా. పాపం మనం సాయంత్రం వీళ్లందరికీ దుప్పట్లు తీసుకుని ఇద్దాం’ అంటుంది హిమ. ‘ఒకసారి మనమిద్దరం బండి మీద వచ్చి అలాగే ఇచ్చాంకదరా? మళ్లీ ఇప్పుడు ఎందుకు అలా అనిపించింది?’ అంటాడు కార్తీక్. ‘వంటలక్క చెప్పింది డాడీ.. సౌర్య పుట్టకముందు సౌర్య వాళ్ల డాడీతో కలిసి వెళ్లి అలాగే ఇచ్చేదట’ అని చెప్పడంతో.. కార్తీక్ గతంలోకి వెళ్లిపోతాడు. వెంటనే మాట మార్చి.. ‘సరే సాయంత్రం ఇద్దాంలే’ అంటూ స్కూల్‌కి బయలుదేరతారు.
రోడ్డు మీద గొడవ
ఓ భార్య ఓ భర్తను లాగిపెట్టి కొడుతూనే ఉంటుంది. కానిస్టేబుల్ ఆపుతూ ఉంటాడు. చుట్టూ జనాలు గుమిగూడతారు. ఇటు వైపు రోడ్డు నుంచి బండి మీద కార్తీక్, హిమలు, అటు వైపు రోడ్డు నుంచి దీప, సౌర్యలు ఆగుతారు. ఆ గొడవను చూస్తూ ఉంటారు. ‘ఏరా నాకు విడాకులు ఇవ్వకుండా రెండో పెళ్లి చేసుకుంటావా? నా పరిస్థితి నా పిల్లల పరిస్థితి ఏంటీ?’ అంటూ భార్య భర్తను కొడుతుంది. ఇంతలో కానిస్టేబుల్.. ‘ఆమెను చెప్పేది నిజమేనా? మొదటి భార్య ఉండగానే.. రెండో పెళ్లి చేసుకుంటే నేరం అని నీకు తెలియదా?’ అంటూ నిలదీస్తాడు. స్టేషన్‌కి తీసుకుని వెళ్తాడు. అయితే ఆ సీన్ చూసిన హిమ మనసులో.. ‘ఓహో.. విడాకులు తీసుకునే రెండో పెళ్లి చేసుకోవాలా? మరి అవి ఎవరు ఇస్తారు?’ అనుకుంటుంది.
దీపా బాగున్నావా?
ఇటు సౌర్య అయితే.. వాడు చేసిన అన్యాయానికి కోపంతో రగిలిపోతుంది. గొడవ సర్దుమనిగే సరికి… ఇటు వైపు ఉన్న కార్తీక్, హిమలను దీప, సౌర్యలు చూస్తారు. వెంటనే ‘మన డాక్టర్ బాబు హిమలు’ అంటూ అటుగా పరుగుతీస్తూ కింద పడిపోతుంది. పైకి లేపిన దీప.. ‘వద్దు అత్తమ్మా.. స్కూల్‌కే వెళ్తాం కదా అక్కడ కలుద్దువుగానీ’ అని ఆపుతుంది. ఇంతలో గొడవ పడిన భార్య దీప దగ్గరకు వచ్చి.. ‘బాగున్నావా దీపా?’ అని అడుగుతుంది. ‘బాగున్నాను.. మీరు?’ అని గుర్తు పట్టనట్లుగా అడుగుతుంది. ‘ఇద్దరం కలిసి పెట్రోల్ బంక్‌లో పని చేశాం కదా..’ అంటూ ఆమె గుర్తు చేయడంతో దీపకు గుర్తుకొస్తుంది. సౌర్య ఆ మాటలు విని షాక్ అవుతుంది.
నీ భర్తని జైల్‌కి పంపించకు!
ఇంతలో హిమ సౌర్య వాళ్లని చూసి అటువైపు వెళ్లాలనుకుంటే.. కార్తీక్ ఒప్పుకోడు. హిమని తీసుకుని స్కూల్‌కి వెళ్లిపోతాడు. ‘అమ్మా నువ్వు పెట్రోల్ బంక్‌లో పని చేశావా?’ అని అడుగుతుంది బాధగా. ‘అవును.. నువ్వు కడుపులో ఉన్నప్పుడు నాలానే మీ అమ్మ కూడా చాలా కష్టాలు పడింది’ అని చెబుతుంది ఆమె. ‘పాప పుట్టినా.. ఇంకా నీ భర్త నిన్ను తీసుకుని వెళ్లలేదా?’ అంటూ మాట కలుపుతుంది. సౌర్య మనసులో ‘ఇప్పుడే (కార్తీక్) వెళ్లిపోయాడు’ అనుకుంటుంది. దీప సౌర్యను తీసుకుని వెళ్తున్న సమయంలో వెనక్కి తిరిగిన సౌర్య.. ఆమెతో.. ‘చూడూ నీ భర్తని జైల్‌కి పంపించకు. ఇంటికి తెచ్చుకో. లేదంటే మీ పిల్లలల్ని నాన్న ఎవరు అని అడుగుతారు. నిన్ను కూడా చాలా మాటలు అంటారు’ అని బాధగా చెబుతుంది. అదంతా విన్న దీప కూడా బాధపడతుంది.
బైక్ మీద వెళ్లారా?
శ్రావ్య ఇంటికి వెళ్లి వచ్చిన సౌందర్య, ఆనందరావులు.. ఆదిత్య దగ్గరకు వచ్చి.. ‘కారు ఇక్కడే కనిపిస్తుంది.. నా కోపిష్టి సుపుత్రుడు ఎక్కడా?’ అని అడుగుతారు. దాంతో ఈ రోజు కొత్తగా నా బైక్ మీద హిమని స్కూల్‌కి తీసుకెళ్లాడట’ అని చెప్పడంతో సౌందర్య, ఆనందరావులు షాక్ అవుతారు. ‘అదేంటీ?’ అని సౌందర్య అడగడంతో.. ‘మన హిమే అలా తీసుకుని వెళ్లమని అడిగిందట మమ్మీ.. మాలతీ(పనిమనిషి) చెప్పింది’ అంటాడు. ‘ఏంటో ఈ మధ్య ఈ పొట్టి బుడంకాయికి చాలా పెత్తనాలు ఎక్కువ అయ్యాయి. ఏం చేస్తుందో ఏంటో ఏం తెలియట్లేదు’ అంటుంది సౌందర్య. ఆనందరావు కూడా అవునంటాడు.
దీప కంట కన్నీరు!
హిమని స్కూల్‌లో డ్రాప్ చేస్తాడు కార్తీక్. వెంటనే.. ‘డాడీ విడాకులు అంటే ఏంటీ?’ అని హిమ కార్తీక్‌ని అడుగుతుంది. ఆటోలో తల్లితో కలిసి స్కూల్‌కి వస్తున్న సౌర్య కూడా దీపని అదే ప్రశ్న వేస్తుంది. ‘విడాకులంటే శాపం’ అని దీప చెప్పగా.. ‘విడాకులంటే వరం’ అని కార్తీక్ చెబుతాడు. ‘కలిసి ఉండాలని ఒకరు కోరుకుని, కలిసి ఉండొద్దని మరొకరు అనుకునే ఓ జంజాటం’ అని దీప సౌర్యతో చెబుతుంటే.. అక్కడ కార్తీక్.. ‘నువ్వు నాకు వద్దు అని భార్య భర్తని, భర్త భార్యని కోర్టుకు తీసుకుని వెళ్తే అక్కడ ఇద్దరి అనుమతీ తీసుకుని విడిపోవడమే విడాకులు’ అంటాడు. ‘అయితే విడాకులు తీసుకుంటే ఇంకెప్పుడూ కలవరా?’ అని అడిగిన ప్రశ్నకు.. దీప ఏడుస్తూ ‘కలవరు.. కలవాలనుకున్న కలవలేరు’ అంటుంది. సౌర్య కూడా తల్లిని బాధగా పట్టుకుంటుంది. కార్తీక్ కూడా అదే సమాధానం హిమతో కఠినంగా చెబుతాడు
డాక్టర్ బాబుకి యాక్సిడెంట్
హిమతో విడాకుల గురించి చెప్పేలోపు సౌర్య, దీపలు ఆటోలో స్కూల్‌కి వస్తారు. హిమ, డాక్టర్ బాబుని చూసిన సౌర్య.. నవ్వుతూ వచ్చి పలకరిస్తుంది. కార్తీక్ మాత్రం నవ్వి నవ్వనట్లుగా ఓ నవ్వు నవ్వుతాడు. ‘ఏంటీ డాక్టర్ బాబు ఈ రోజు బైక్ మీద వచ్చారు?’ అని సౌర్య అడగడంతో.. ‘నేనే అడిగాను సరదాగా’ అంటుంది హిమ. మొత్తానికి హిమకు బాయ్ చెప్పి బయలుదేరిన కార్తీక్.. సౌర్యని, దీపని వెనక్కి వెనక్కి చూస్తూ బైక్ మీద వెళ్తుంటాడు. ఇంతలో సౌర్య ప్రేమగా చూస్తూ.. బండీ మీద తన తల్లి దీప ఉన్నట్లుగా ఊహించుకుంటుంది. పక్కనే ఉన్న దీప.. సౌర్య భుజం మీద చేయి వేసేసరికి అది ఊహకావడంతో బాధగా చూస్తుంది. ఇంతలో కార్తీక్ ఓ ఆటోని ఢీకొట్టి కింద పడిపోతాడు. అది చూసిన హిమ ‘డాడీ’ అంటూ పరుగుతీస్తుంది. వెనుకే దీప, సౌర్యలు పరుగుతీస్తారు.
కమింగ్ అప్‌లో..
కార్తీక్ పైకి లేవలేని స్థితిలో కిందే ఇబ్బంది పడుతూ ఉంటాడు. వెంటనే దీప కళ్లనిండా నీళ్లతో.. ‘డాక్టర్ బాబూ’ అంటూ.. కాలు పట్టుకుని కాలికి ఉన్న షూ తీసేసి.. తన భుజం సపోర్ట్ ఇస్తూ పైకి లేపి.. చుట్టూ పరిసరాలను మరిచిపోయి తన ప్రేమనంతా చూపిస్తుంది. అయితే హిమ మనసులో.. ‘ఏం కానీ డాడీ కోసం వంటలక్క ఇంత బాధపడుతుంటే పెళ్లి చేస్తే ఇంకెంత బాగా చూసుకుంటుందో కదా?’ అనుకుంటుంది. సౌర్య మనసులో.. ‘ఇటు హిమ వీళ్లకి పెళ్లి చేయాలనుకుంటుంది. నేను వీళ్లని కలపాలనుకుంటున్నాను’ అని ఆలోచిస్తుంది. మరిన్ని వివరాలు తరువాయి భాగంలో చూద్దాం! కార్తీకదీపం కొనసాగుతోంది.
