టాలీవుడ్ లో కమెడియన్ గా కెరియర్ స్టార్ట్ చేసి తరువాత హీరో గా సక్సెస్ అయ్యి ఇప్పుడు క్యారెక్టర్ ఆర్టిస్ట్ గా విలన్ గా తనని తాను షోకేస్ చేసుకుంటున్న నటుడు సునీల్. పుష్ప సినిమా తర్వాత సునీల్ లోనే నట విశ్వరూపం అందరికి పరిచయం అయ్యింది. దీంతో విలన్ గా వరుస అవకాశాలు వస్తున్నాయి. ఏకంగా సూపర్ స్టార్ రజినీకాంత్ జైలర్ సినిమాలో విలన్ గా నటిస్తున్నాడు.
దాంతో పాటు మరో మూడు తమిళ్ సినిమాలలో సునీల్ విలన్ గా నటిస్తూ ఉండటం విశేషం. ఇదిలా ఉంటే తెలుగులో పుష్ప తర్వాత చిన్న చిన్న సినిమాలలో సునీల్ హీరో స్థాయి ప్రాధాన్యత ఉన్న పాత్రలు చేస్తూ వచ్చాడు. అయితే మరల పుష్ప రేంజ్ లో నిలబెట్టే రోల్ మాత్రం టాలీవుడ్ లో ఇంకా పడలేదు. ఇదిలా ఉంటే మాటల మాంత్రికుడు త్రివిక్రమ్ శ్రీనివాస్ సునీల్ మంచి మిత్రులు అనే సంగతి అందరికి తెలిసిందే.
ఇక సునీల్ స్టార్ కమెడియన్ గా మారడంలో త్రివిక్రమ్ పాత్ర చాలా కీలకం అని కూడా చెప్పాలి. తాను రైటర్ గా పనిచేసిన ప్రతి సినిమాలో సునీల్ కోసం మంచి ఫన్ రైడ్ రోల్స్ ని క్రియేట్ చేస్తూ వచ్చాడు. ఆ పాత్రలలో నటిస్తూ సునీల్ స్టార్ అయిపోయాడు. ఇక రాజమౌళి సునీల్ ని మర్యాద రామన్న సినిమాతో కమర్షియల్ హీరో చేసేశారు. ఇప్పుడు సుకుమార్ సునీల్ లోనే అసలైన సీరియస్ నటుడిని బయట కి తీసుకొచ్చి విలన్ గా మార్చాడు.
అయితే హీరో గా ఛాన్స్ లు తగ్గి మరల క్యారెక్టర్ ఆర్టిస్ట్ గా బిజీ అవుతున్న సునీల్ కి త్రివిక్రమ్ శ్రీనివాస్ అరవింద సమేత అల వైకుంఠపురంలో సినిమాలలో అవకాశాలు ఇచ్చారు. అయితే అవి అంత ప్రాధాన్యత ఉన్న పాత్రలయితే కాదు. కాని నటుడి గా బిజీ కావడానికి ఈ రెండు పాత్రలు సునీల్ కి సహకరించాయి. మరల ఇప్పుడు సూపర్ స్టార్ మహేష్ బాబు సినిమాలో కూడా త్రివిక్రమ్ కోసం మంచి ఇంటరెస్టింగ్ రోల్ ని సునీల్ కోసం త్రివిక్రమ్ రెడీ చేసినట్లు తెలుస్తుంది.
ఈ విషయాన్ని సునీల్ తాజాగా క్లారిటీ ఇచ్చారు. ఇది కూడా సినిమాలో పూర్తి నిడివి ఉన్న పాత్ర అయితే కాదంట. కాని మంచి ప్రాధాన్యత ఉంటుందంట. త్రివిక్రమ్ సినిమాలో కూడా సునీల్ విలన్ గా ఫుల్ లెంత్ రోల్ చేస్తే చూడాలని ఆడియన్స్ కోరుకుంటున్నారు. ఇక సూపర్ స్టార్ మహేష్ త్రివిక్రమ్ కాంబో లో వచ్చిన అతడు ఖలేజా సినిమాలో మంచి ఫన్ క్రియేట్ చేసే పాత్రల్లోనే సునీల్ నటించి మెప్పించాడు. మరి ఈ సినిమాలో ఎలా ఉండబోతుంది అనేది చూడాలి.
