కొన్ని రోజుల క్రితం రజినీకాంత్‌ హీరోగా తెరకెక్కుతున్న ఒక సినిమాలో విలన్‌కు గాను తెలుగు హీరో గోపీచంద్‌ను సంప్రదించారట. దర్శకుడు శివ పదే పదే గోపీచంద్‌తో ఆ విలన్‌ పాత్రను చేయించేందుకు ప్రయత్నించాడట. కాని గోపీచంద్ మాత్రం ఆ పాత్రపై ఆసక్తి చూపించలేదు. విలన్‌గా చేస్తే మళ్లీ హీరోగా ఆఫర్లు రావనే ఉద్దేశ్యంతో సూపర్‌ స్టార్‌ మూవీ అయినా నో చెప్పాడని వార్తలు వచ్చాయి. అయితే గోపీచంద్ నిర్ణయాన్ని కొందరు తప్పుబట్టారు.
రజినీకాంత్‌ మూవీలో ఛాన్స్‌ అంటే చేయాల్సింది. ఆ సినిమాలో చేస్తే మంచి గుర్తింపు దక్కేది. ఆ తర్వాత మళ్లీ హీరోగా చేసుకునే అవకాశం ఉండేదని అంటున్నారు. ఇప్పుడు అలాంటి ఛాన్స్‌ యంగ్‌ హీరో కార్తికేయకు వచ్చిందట. సినీ వర్గాల నుండి అందుతున్న సమాచారం ప్రకారం కార్తికేయను ప్రముఖ కోలీవుడ్‌ స్టార్‌ హీరో అజిత్‌ సినిమాలో విలన్‌గా నటింపజేసేందుకు ప్రయత్నాలు చేస్తున్నారని, అందుకు కార్తికేయ కూడా దాదాపుగా ఓకే చెప్పాడని అంటున్నారు.
ఆర్‌ఎక్స్‌100 చిత్రంతో హీరోగా నటించి మెప్పించిన కార్తికేయ ఆమద్య నాని గ్యాంగ్‌ లీడర్‌ చిత్రంలో విలన్‌గా నటించిన విషయం తెల్సిందే. ఆ సినిమాలో తన పాత్రకు పూర్తి న్యాయం చేసిన కాక్తికేయ ప్రస్తుతం రెండు సినిమాల్లో హీరోగా నటిస్తున్నాడు. అయినా కూడా ఏమాత్రం బేషజాలకు వెళ్లకుండా విలన్‌ పాత్రలో అజిత్‌ సినిమాలో చేసేందుకు ఒప్పుకున్నాడు. తెలివైన నటుడు అంటూ ఈయన్ను ప్రస్తుతం సినీ వర్గాల్లో అభివర్ణిస్తున్నారు.
