గత ఎపిసోడ్‌లో ఏం జరిగిందంటే…
బస్తీ వాల్లంతా ‘నిర్దోషిగా తిరిగి రావాలని’ ఆశీర్వదించి.. చిన్నీని అందరూ కోర్టుకు సాగనంపుతారు. ఇటు సింధూ కూడా అమర్‌ని రెచ్చగొట్టి శివానంద్ కంటే పెద్ద లాయర్‌(గణపతి) దగ్గరకు తీసుకుని వెళ్లి మాట్లాడుతుంది. చిన్నప్పటి నుంచి తను చేసిన పనులన్నింటినీ తన యాంగిల్‌లో లాయర్‌కి చెబుతుంది. అమర్‌ కూడా అదే కోరుకుంటాడు.
750 ఎపిసోడ్‌ హైలెట్స్‌..
కోర్టు దగ్గర శివానంద్, సమీర్‌లు ఎదురు చూస్తుండగా.. ధనా ఆటోలో చిన్నీ వస్తుంది. అప్పటికే శివానంద్‌కి లాయర్‌ గణపతి ఫోన్‌ చేసి.. ’చిన్నీ కేసు నేను టేకప్‌ చేస్తున్నాను. చిన్నీ దోషిగా నేను నిరూపిస్తాను. నువ్వు ఓడిపోవడం గ్యారెంటీ.. వీలైతే ఇప్పుడైనా తప్పుకో. పరువు దక్కించుకో’ అని సలహా ఇస్తాడు. అందుకు శివానంద్ నో చెబుతాడు. నేను న్యాయం వైపే నిలబడతాను అని చెబుతాడు.
ఇంద్రజా సింధూలు ఫోన్‌లో మాట్లాడుకోవడం లక్ష్మీ వింటుంది. చిన్నీకి కచ్చితంగా శిక్షపడుతుంది అని ఇంద్రజ అన్న మాటలు విని.. కోర్టుకు పరుగుతీస్తుంది లక్ష్మీ. ఇంతలో సింధూ, అమర్‌ కూడా కోర్టుకు రావడంతో.. అమర్‌ చిన్నీని చూసి బాగా తిడతాడు. దాంతో ధనా అమర్‌ కాలర్‌ పట్టుకుని గొడవపడతాడు. దాంతో చిన్నీ ఏడుస్తూ ధనాని కొట్టడంతో గొడవ ఆగుతుంది.
అంతా జడ్జ్‌ ముందు ఉండగా.. చిన్నీని బోనులోకి రమ్మంటారు. లాయర్‌ గణపతి.. ‘చిన్నీని నీ పేరు?‘ అని అడుగుతాడు. ‘కోకిల’ అని చెబుతుంది చిన్నీ. మళ్లీ గణపతి.. ‘మీ పేరు?’ అని అడుగుతాడు. ‘చిన్నీ’ అంటుంది చిన్నీ. మళ్లీ గణపతి.. ‘మీ పేరు?’ అని రెట్టిస్తాడు. ‘బుజ్జమ్మ’ అంటుంది చిన్నీ. అయితే ఇంతలో శివానంద్.. అడ్డపడతాడు. గణపతి గారు ‘చిన్నీని కన్‌ఫ్యూజ్‌ చేస్తున్నారని’ వాదిస్తాడు. అయితే అందుకు గణపతి ఒప్పుకోకపోగా.. చిన్నీ తల్లి గారైన లక్ష్మీ గారిని పిలిచి ప్రశ్నలు వేయడం మొదలుపెడతాడు.
చిన్నీ నా కన్న బిడ్డ కాదు అని చెప్పేదాక రకరకాల ప్రశ్నలు వేస్తాడు లాయర్‌ గణపతి. చిన్నప్పుడు చిన్నీ అబ్బాయిలా వేషం వేసుకున్న విషయాన్ని కూడా లేవనెత్తి.. చిన్నప్పటి నుంచి మోసం చేయడం చిన్నీకి అలవాటు అనే అభిప్రాయం కలిగేలా చేస్తాడు. మొత్తానికి కేసు బిగుసుకోనుంది. చిన్నీ జైల్లోనే ఉండే పరిస్థితి కనిపిస్తోంది. మరిన్ని వివరాలు తరువాయి భాగంలో చూద్దాం! కోయిలమ్మ కొనసాగుతోంది.
