తెలుగు సినిమాల‌పై తెగ ఇష్టాన్ని పెంచుకుంటున్నాడు ఆస్ట్రేలియా క్రికెట‌ర్ డేవిడ్ వార్నర్. ఈయ‌న ఐపీఎల్‌లో స‌న్‌రైజ‌ర్స్‌కు ప్రాతినిథ్యం వ‌హిస్తున్న విష‌యం తెలిసిందే. ఎందుకో గాని తెలుగు సినిమా పాట‌లు, డైలాగ్‌ల‌కు వార్నర్ ఫిదా అయ్యాడు. ఏ మాత్రం స‌మ‌యం చిక్కినా తెలుగు సినిమాల‌కు సంబంధించి డైలాగులో, పాట‌ల‌కు డ్యాన్సో చేస్తూ తెలుగు వాళ్ల అభిమానాన్ని చూర‌గొంటున్నాడు.
ఇటీవ‌ల అల్లు అర్జున్ న‌టించిన “అల వైకుంఠ‌పురములో”…సినిమాలోని బుట్ట‌బొమ్మ పాట‌కు త‌న భార్య‌తో క‌లిసి డ్యాన్స్ చేశాడు. ఈ వీడియో సోష‌ల్ మీడియాలో వైర‌ల్ కావ‌డంతో నెటిజ‌న్లు ప్ర‌శంసల వ‌ర్షం కురిపించారు.
ఆ జోష్‌తో వార్నర్ మ‌రో తెలుగు సినిమా డైలాగ్‌తో ముందుకొచ్చాడు. సూప‌ర్‌స్టార్ మ‌హేశ్‌బాబు హీరోగా న‌టించిన, బంప‌ర్ హిట్ టాక్ తెచ్చుకున్న పోకిరి సినిమాలోని “ఒక్క‌సారి క‌మిట్ అయితే నా మాట నేనే విన‌ను” అనే డైలాగ్ టిక్‌టాక్ వీడియోను వార్నర్ అభిమానుల‌తో షేర్ చేసుకున్నాడు. అంతేకాదు, ఈ సినిమా పేరేంటో తెలుసా? మీ అదృష్టాన్ని ప‌రీక్షించుకోండి అంటూ ఇన్‌స్టాలో షేర్ చేశాడు.
వార్నర్ డైలాగ్ చెప్పిన వీడియో చూసి ద‌ర్శ‌కుడు పూరి జ‌గ‌న్నాథ్ ముగ్ధుడ‌య్యాడు. ఎందుకంటే పోకిరి సినిమా ద‌ర్శ‌కుడు పూరినే. దీంతో పూరి స్పందిస్తూ…”డేవిడ్ వార్నర్ ఇది నువ్వేనా? ఈ డైలాగ్ నీ బాడీ లాంగ్వేజ్‌కి స‌రిగ్గా స‌రిపోయింది. నువ్వు న‌టుడిగా కూడా రాణించ‌గ‌ల‌వు. భ‌విష్య‌త్‌లో కుదిరితే నా సినిమాలో అతిథి పాత్ర ఇస్తా. ల‌వ్యూ” అంటూ ట్వీట్ చేశాడు. మొత్తానికి తెలుగు భాష ఎంత మ‌ధుర‌మైన‌దో వార్నర్ ఫిదా కావ‌డాన్ని బ‌ట్టి అర్థం చేసుకోవ‌చ్చు.
