మెగా ఫ్యామిలీ నుండి ఎంతో మంది హీరోలుగా ఎంట్రీ ఇచ్చారు. అయితే హీరోయిన్స్ గా మాత్రం కేవలం నిహారిక మాత్రమే ఎంట్రీ ఇచ్చింది. నాగబాబు కూతురు నిహారిక హీరోయిన్‌ గా చేసిన సినిమాలు నిరాశ పర్చాయి. దాంతో ఆమె మళ్లీ సినిమాల పై ఆసక్తి చూపడం లేదు. కాని ఆమె నటిగా కొనసాగుతోంది. వెబ్‌ సిరీస్ ను చేస్తున్న ఆమె త్వరలోనే కొత్త వెబ్‌ సిరీస్ తో ప్రేక్షకుల ముందుకు వచ్చే అవకాశాలు ఉన్నాయి. ఇదే సమయంలో నిహారిక దారిలో చిరంజీవి పెద్ద కూతురు సుష్మిత కూడా వెండి తెరపై అడుగు పెట్టేందుకు సిద్దం అవుతున్నట్లుగా సమాచారం అందుతోంది.
ఇప్పటికే నిర్మాతగా సుష్మిత ఒక వెబ్‌ సిరీస్ ను నిర్మించింది. ఇక కాస్ట్యూమ్స్ డిజైనర్‌ గా ఖైదీ నెం.150, సైరా మరియు ఆచార్య సినిమాలకు చేసింది. నటిగా కూడా తనను తాను నిరూపించుకునేందుకు సిద్దం అయినట్లుగా తెలుస్తోంది. తమిళ సూపర్‌ హిట్ మూవీ 8 తొట్టకల్‌ అనే సినిమా రీమేక్ రైట్స్ ను తీసుకుంది. సొంతంగా నిర్మిస్తూ ఆ సినిమాలో కీలక పాత్రను పోషించేందుకు సిద్దం అయ్యిందట. ఈ సినిమాపై అంచనాలు భారీగా ఉన్నాయి. అంచనాలకు తగ్గట్లుగా ఒక ట్యాలెంటెడ్‌ డైరెక్టర్‌ చేతిలో ఈ సినిమాను పెట్టి చేయించాలని ఆమె భావిస్తుంది.
