సోషల్ మీడియా బాగా యాక్టివ్‌గా ఉన్న ఈ రోజుల్లో సెలబ్రెటీలు ప్రతి మాటా జాగ్రత్తగా మాట్లాడాలి. సోషల్ మీడియాలో ఏం పోస్ట్ చేసినా అప్రమత్తంగా ఉండాలి. పదం పదం సరి చూసుకున్నాకే పోస్ట్ చేయాలి. వాళ్ల మాటల్లో ఏ చిన్న తప్పిదం దొర్లినా అంతే సంగతులు. నిమిషాల్లో రచ్చ రచ్చ అయిపోతుంది. ఆ తర్వాత తమ పోస్టుల్ని డెలీట్ చేసినా ప్రయోజనం ఉండదు.
చిన్న చిన్న విషయాల్ని కూడా పట్టుకుని వివాదం చేసే జనాలు సోషల్ మీడియాలో అదే పనిగా కాచుకుని ఉంటారు. తాజాగా తమిళ స్టార్ కమెడియన్ అనాలోచితంగా చేసిన ఒక ట్వీట్ దుమారం రేపింది. ఆయన్ని వివాదంలోకి నెట్టింది. ఇంతకీ వివేక్ చేసిన ట్వీట్ ఏంటంటే..?
‘‘ప్రియమైన విద్యార్థులారా.. వేసవి వచ్చేసింది. సెలవులను ఆస్వాదించండి. ఆటలాడిన తర్వాత నీళ్లు ఎక్కువ తాగండి. ఆడ పిల్లలూ వంటగదిలో మీ అమ్మకు సహాయంగా ఉండండి. వంట నేర్చుకోండి. మగపిల్లలూ మీ తండ్రి పని ప్రదేశానికి వెళ్లండి. మీ కుటుంబం కోసం ఆయన ఎలా పనిచేస్తున్నారో చూడండి’.. ఇదీ వివేక్ ట్వీట్ సారాంశం. ఐతే ఇందులో ఆడపిల్లలకు ఇచ్చిన సలహా వివాదాస్పదమైంది.
సెలవుల్లో ఆడపిల్లలు మాత్రమే వంట చేయాలని సలహా ఇస్తారా.. వాళ్లు వంట గదికే పరిమితం కావాలా.. అబ్బాయిలు మాత్రం వేరే పనులకు వెళ్లాలా? వాళ్లకెందుకు వంట నేర్చుకోమని సలహా ఇవ్వలేదు అంటూ నెటిజన్లు వివేక్‌కు ప్రశ్నల మీద ప్రశ్నలు సంధించారు. దీనికి ఎలా బదులివ్వాలో కూడా వివేక్ కు అర్థం కాలేదు. ఆయనేదో మామూలుగా అంటే దాన్ని పట్టుకుని ఇంత వివాదం చేస్తారేంటంటూ కొందర సపోర్ట్ చేసినప్పటికీ వివేక్ ను తిట్టిన వాళ్లే ఎక్కువమంది.
