స్టార్ హీరోల పుట్టిన రోజు వస్తోందంటే అభిమానులకు ఏదో ఒక కానుక ఇవ్వాల్సిందే. అప్పటికే ఏదైనా కొత్త సినిమాలో నటిస్తుంటే ఫస్ట్ లుక్కో.. ఫస్ట్ టీజరో.. ఇంకోటో లాంచ్ చేయాల్సిందే. ఈ నెల 20న జూనియర్ ఎన్టీఆర్ పుట్టిన రోజన్న సంగతి తెలిసిందే.
గత నెలలోనే త్రివిక్రమ్ దర్శకత్వంలో ఎన్టీఆర్ కొత్త సినిమా మొదలుపెట్టిన నేపథ్యంలో ఆ సినిమాకు సంబంధించిన ఏదో ఒక విశేషాన్ని అభిమానులతో పంచుకునే అవకాశముందని కొన్ని రోజుల కిందట్నుంచే ప్రచారం జరుగుతోంది. ఫస్ట్ లుక్ అని కొందరు.. టైటిల్ ప్రకటిస్తారని ఇంకొందరు.. ఇంకేదో విశేషం ఉంటుందని మరికొందరు అంటున్నారు. ఈ ఊహాగానాలకు తగ్గట్లే ఎన్టీఆర్ పీఆర్వో ఒక ట్వీట్ చేశాడు.
ఎన్టీఆర్ పుట్టిన రోజు కోసం ప్రత్యేకమైన కానుక రెడీ అవుతోందన్నాడు. దానికి సంబంధించిన పని నడుస్తోందని.. ఈ కానుక అభిమానుల్ని ఎంతమాత్రం నిరాశ పరచదని.. వాళ్ల నిరీక్షణకు తగ్గట్లే ఉంటుందని చెప్పాడు. ఈ ట్వీట్ చూశాక ఎన్టీఆర్ అభిమానుల్లో ఎక్కడలేని ఉత్సాహం వచ్చింది. ఎన్నో ఏళ్ల నిరీక్షణ తర్వాత ఎన్టీఆర్-త్రివిక్రమ్ కాంబినేషన్ కుదరడంతో వీళ్ల కలయికలో వచ్చే సినిమాపై భారీ అంచనాలు నెలకొన్నాయి.
రాయలసీమ బ్యాక్ డ్రాప్ లో ఈ సినిమా నడుస్తుందని అంటున్నారు. ఇప్పటికే రెండు షెడ్యూళ్ల షూటింగ్ పూర్తయింది. కొత్త షెడ్యూల్లో హీరోయిన్ పూజా హెగ్డే కూడా పాల్గొంటోంది. పవన్ మిత్రుడు రాధాకృష్ణ దర్శకత్వంలో తెరకెక్కుతున్న ఈ చిత్రానికి ‘అసామాన్యుడు’ అనే టైటిల్ ప్రచారంలో ఉంది. ఈ చిత్రానికి తమన్ సంగీతాన్నందిస్తున్నాడు.
