గత దశాబ్ద కాలంలో రామ్ గోపాల్ వర్మ నుంచి ఎలాంటి సినిమాలొచ్చాయో అందరికీ తెలిసిందే. ‘శివ’ మొదులకుని.. రంగీలా, సత్య, కంపెనీ, సర్కార్ లాంటి సినిమాలతో దేశవ్యాప్తంగా తన పేరు మారుమోగిపోయేలా చేసుకున్న వర్మ.. ఆ తర్వాత చెత్త సినిమాలతో తనకున్న పేరు మొత్తం పోగొట్టుకున్నాడు.
ఒకప్పుడు వర్మతో సినిమా కోసం తహతహలాడిపోయిన హీరోలు.. ఆ తర్వాత ఆయన్ని చూసి పారిపోయే పరిస్థితి వచ్చింది. ఇలాంటి టైంలోనూ వర్మతో సినిమా చేయడానికి ఓకే చెప్పి అందరినీ ఆశ్చర్యపరిచాడు అమితాబ్ బచ్చన్. వీళ్లిద్దరి కాంబినేషన్లో తెరకెక్కిన కొత్త సినిమా ‘సర్కార్-3’.
ఈ చిత్రం షూటింగ్ పూర్తి చేసుకుని చాలా కాలమైంది. మార్చి 17నే ‘సర్కార్-3’ని విడుదల చేయడానికి సన్నాహాలు కూడా జరిగాయి. కానీ ఏం జరిగిందో ఏమో.. ఏప్రిల్ 7కు వాయిదా వేశారు. తర్వాత ఆ డేట్ కూడా మారింది. ఇప్పుడు మే 12న రిలీజ్ అంటున్నారు. సినిమా ఎందుకిలా వాయిదాల మీద వాయిదాలు పడుతోందో ఎవ్వరికీ అర్థం కావడం లేదు. ఔట్ పుట్ తేడా కొట్టడంతో రీషూట్లు జరుగుతున్నట్లుగా ఓ ప్రచారం జరిగింది.
తాజాగా అమితాబ్ బచ్చనే స్వయంగా ఈ విషయాన్ని ధ్రువీకరించాడు. ‘సర్కార్-3’ రీషూట్ మోడ్‌లో ఉందంటూ ఆయన కొన్ని ఫొటోల్ని షేర్ చేశాడు. ‘సర్కార్-3’ ఆన్ లొకేషన్ పిక్స్ అవి. ఈ రీషూట్లకు కారణమేంటో తర్వాత చెబుతానంటూ సస్పెన్సులో పెట్టాడు బిగ్ బి. మరి ఈ రీషూట్ల సంగతి ఎప్పుడు తేలుతుందో.. సినిమా ఎప్పుడు రిలీజవుతుందో చూడాలి.
