మెగాస్టార్ చిరంజీవి.. కలెక్షన్ కింగ్ మోహన్ బాబు మంచి స్నేహితుల్లాగే కనిపిస్తారు. కానీ ఇద్దరి మధ్య విభేదాలు కూడా ఉన్నట్లు కనబడుతూ ఉంటుంది. మోహన్ బాబు కొన్ని సందర్భాల్లో చిరంజీవికి చురకలంటించే ప్రయత్నాలు చేశారు.
ఐతే అదంతా గతం. ఈ మధ్య ఇద్దరూ సఖ్యతతోనే మెలుగుతున్నారు. మోహన్ బాబు చిన్న కొడుకు మంచు మనోజ్ కొత్త సినిమా ‘గుంటూరోడు’ కోసం చిరంజీవి మాట సాయం చేయడానికి కూడా ఒప్పుకోవడం విశేషం. రెండేళ్ల కిందట ‘రుద్రమదేవి’ సినిమాకు.. ఈ మధ్యే ‘ఘాజీ’ చిత్రానికి చిరంజీవి వాయిస్ ఓవర్ ఇచ్చిన సంగతి తెలిసిందే. ఆ రెండు సినిమాలకూ మంచి ఫలితం దక్కడంతో చిరు వాయిస్ ఓవర్ అన్నది హిట్టు సెంటిమెంటుగా మారింది.
‘గుంటూరోడు’ సినిమాకు చిరు వాయిస్ ఓవర్ ఇచ్చినట్లుగా ఈ రోజే చిత్ర నిర్మాణ సంస్థ వెల్లడించింది. మెగాస్టార్‌కు ఈ విషయమై థ్యాంక్స్ చెబుతూ.. పోస్టర్లు కూడా వదిలింది. ఊర మాస్ అవతారంలో కనిపిస్తున్న మనోజ్ గురించి సినిమాలో చిరు ఏమని పరిచయం చేస్తాడో చూడాలి. నెల రోజుల నుంచి మంచి రిలీజ్ డేట్ కోసం చూస్తున్న ‘గుంటూరోడు’ ఈ మధ్యే మార్చి 3కు ఫిక్సయింది. ప్రమోషన్ కొంచెం గట్టిగానే చేస్తున్నారు ఇప్పట్నుంచే. చిరంజీవి వాయిస్ ఓవర్ ఇవ్వడమన్నది ఈ సినిమాకు కచ్చితంగా ప్లస్ అయ్యేదే. ‘నా రాకుమారుడు’ ఫేమ్ ఎస్కే సత్య దర్శకత్వం వహించిన ఈ చిత్రంలో మనోజ్ సరసన ప్రగ్యా జైశ్వాల్ కథానాయికగా నటించింది.
