తెలంగాణ ఫోక్ సాంగ్స్కు యూట్యూబ్లో ఉన్న ఆదరణ గురించి ప్రత్యేకంగా చెప్పాల్సిన అవసరం లేదు. అలాంటి పాటల్లో తన ఎనర్జిటిక్ డ్యాన్స్తో ప్రేక్షకులను ఆకట్టుకుని, లక్షలాది అభిమానులను సంపాదించుకున్న పేరు గుత్తా నాగదుర్గ. ‘తిన్నా తిరం పడతలే’ వంటి వైరల్ ఫోక్ సాంగ్స్తో గుర్తింపు తెచ్చుకున్న ఈ నల్గొండ యువతి, ఇప్పుడు వెండితెరపై కథానాయికగా అడుగుపెడుతోంది.
నల్గొండ జిల్లాకు చెందిన నాగదుర్గకు చిన్నప్పటి నుంచే నృత్యంపై ప్రత్యేక ఆసక్తి. ఆ ఆసక్తితో క్లాసికల్ డ్యాన్స్లో శిక్షణ తీసుకుని, కూచిపూడిలో మాస్టర్స్ డిగ్రీ పూర్తి చేశారు. ప్రొఫెషనల్ డ్యాన్సర్గా తన ప్రతిభను నిరూపించుకున్న ఆమె, తర్వాత యూట్యూబ్ను వేదికగా చేసుకుని ప్రేక్షకులకు మరింత చేరువయ్యారు.
క్లాసికల్తో పాటు తెలంగాణ సంస్కృతిని ప్రతిబింబించే ఫోక్ సాంగ్స్లో ఆమె చేసిన డ్యాన్స్ ప్రదర్శనలు విశేష ఆదరణ పొందాయి. ముఖ్యంగా ‘తిన్నా తిరం పడతలే’, ‘దారిపొంటత్తుండు’, ‘పేరుగల్ల పెద్దిరెడ్డి’, ‘కప్పోళ్ల ఇంటికాడ’ వంటి పాటలు ఆమెకు విపరీతమైన క్రేజ్ను తీసుకొచ్చాయి. ఈ పాటలతో నాగదుర్గ ప్రతి ఇంటికీ పరిచయమైన ముఖంగా మారిపోయారు.
కేవలం డ్యాన్స్ చేయడానికే పరిమితం కాకుండా, కళను మరింత మందికి చేరవేయాలనే ఉద్దేశంతో నాగదుర్గ ‘NN నృత్యాలయం’ పేరుతో డ్యాన్స్ అకాడమీని స్థాపించారు. ఈ అకాడమీ ద్వారా చిన్నారులు, యువతకు నృత్యంలో శిక్షణ అందిస్తూ గురువుగానూ తన సేవలను కొనసాగిస్తున్నారు.
యూట్యూబ్లో వచ్చిన గుర్తింపే ఆమెకు సినీ అవకాశాల తలుపులు తెరిచింది. టాలెంటెడ్ నటుడు ప్రియదర్శి హీరోగా, సుకుమార్ రైటింగ్స్ నిర్మిస్తున్న ‘ఇడుపు కాయితం’ చిత్రంతో నాగదుర్గ టాలీవుడ్లో హీరోయిన్గా పరిచయం కానున్నారు. అలాగే తమిళంలో ఆమె నటించిన ‘లవ్ ఓ లవ్’ చిత్రం కూడా విడుదలకు సిద్ధమవుతోంది.
ఒక సాధారణ పల్లెటూరి అమ్మాయి నుంచి యూట్యూబ్ స్టార్గా, అక్కడి నుంచి వెండితెర కథానాయికగా ఎదిగిన గుత్తా నాగదుర్గ ప్రయాణం ఎంతో మందికి స్ఫూర్తిదాయకం. ప్రతిభ, కృషి, పట్టుదల ఉంటే అవకాశాలు వాటంతట అవే వస్తాయని ఆమె కెరీర్ మరోసారి నిరూపిస్తోంది.
Recent Random Post:
