హీరోయిన్ల కెరీర్లో సేఫ్ జోన్లో కొనసాగడం చాలా సాధారణమైన విషయం. స్టార్ ఇమేజ్, మార్కెట్ను దృష్టిలో పెట్టుకుని ఎక్కువ మంది గ్లామర్ పాత్రలు లేదా కమర్షియల్ సినిమాల వైపే మొగ్గు చూపుతుంటారు. కానీ అనుపమ పరమేశ్వరన్ మాత్రం ఈ దారికి భిన్నంగా తన కెరీర్ను కొనసాగిస్తోంది.
కెరీర్ ప్రారంభంలో పక్కింటి అమ్మాయి తరహా పాత్రలతో గుర్తింపు తెచ్చుకున్న ఈ మలయాళీ భామ, గత కొంతకాలంగా నటనకు ప్రాధాన్యం ఉన్న పాత్రలకే ఎక్కువగా మొగ్గు చూపుతోంది. తాజాగా విడుదలైన మరీచిక కూడా అదే కోవలోకి చేరింది. సినిమా ఫలితం ఎలా ఉన్నా, అందులో అనుపమ చేసిన పాత్ర మాత్రం ప్రస్తుతం సినీ వర్గాల్లో చర్చనీయాంశంగా మారింది.
మరీచికలో అనుపమ పోషించిన వెంకటలక్ష్మి పాత్ర సాధారణ హీరోయిన్ క్యారెక్టర్ కాదు. ఒకవైపు అమాయకంగా కనిపించే యువతిగా, మరోవైపు పూర్తిగా భిన్నమైన కోణాన్ని చూపించే పాత్రగా దర్శకుడు ఆమె పాత్రను డిజైన్ చేయడం ప్రేక్షకులకు సర్ప్రైజ్ ఇచ్చింది. పళ్లకు క్లిప్స్, కళ్లద్దాలతో కనిపించే లుక్ ఒకవైపు, మోడరన్ షేడ్లో కనిపించే మరోవైపు—ఈ రెండు వైవిధ్యాలు పాత్రకు కొత్తతనం తీసుకొచ్చాయి.
మానసిక సంఘర్షణలతో బాధపడే యువతిగా ఒక సందర్భంలో కనిపిస్తే, మరో సందర్భంలో పరిస్థితులను అర్థం చేసుకున్న తెలివైన వ్యక్తిగా కనిపించడం అనుపమ నటనకు పెద్ద పరీక్షగా నిలిచింది. ఈ రెండు షేడ్స్ను తెరపై సమర్థంగా ప్రదర్శించడంలో ఆమె విజయవంతమైందని ప్రేక్షకుల నుంచి అభిప్రాయం వ్యక్తమవుతోంది.
ఇటీవలి కాలంలో అనుపమ ఎంచుకుంటున్న ప్రాజెక్టులను చూస్తే, ఆమె స్పష్టంగా పెర్ఫార్మర్గా తనను తాను నిరూపించుకోవాలనే ప్రయత్నంలో ఉన్నట్లు కనిపిస్తోంది. కార్తికేయ 2, కిష్కిందపురి విజయాల తర్వాత కూడా పూర్తిగా కమర్షియల్ ఫార్ములాకే పరిమితం కాకుండా పరదా, బైసన్, లాక్డౌన్, ఇప్పుడు మరీచిక వంటి విభిన్న కథల వైపు అడుగులు వేస్తోంది.
హీరోయిన్ చుట్టూ తిరిగే కథలు, నటనకు ఎక్కువ ప్రాధాన్యం ఉన్న పాత్రలను ఎంచుకోవడం ఆమె కెరీర్లో కొత్త దశగా భావించవచ్చు. స్టార్ హీరోల సినిమాల్లో కేవలం సాంగ్స్, రొమాన్స్కే పరిమితమయ్యే పాత్రల కంటే సవాళ్లు ఉన్న పాత్రలకే ఆమె ఆసక్తి చూపడం విశేషం.
సాధారణంగా హీరోయిన్లు సక్సెస్ ఫేజ్లో ఇలాంటి ప్రయోగాలు చేయడానికి వెనుకాడతారు. కానీ అనుపమ మాత్రం రిస్క్ తీసుకుంటూ కొత్త మార్గాన్ని ఎంచుకుంటోంది. ఈ ప్రయోగాలు కొన్నిసార్లు కమర్షియల్గా పెద్ద విజయాలు సాధించకపోయినా, నటిగా ఆమెకు ప్రత్యేక గుర్తింపు తీసుకొస్తున్నాయి.
అందుకే మరీచికను కేవలం మరో సినిమాగా కాకుండా, అనుపమ పరమేశ్వరన్ కెరీర్లో ఒక కీలక మలుపుగా సినీ విశ్లేషకులు చూస్తున్నారు. హీరోయిన్గా మాత్రమే కాకుండా బలమైన పాత్రలను మోసే నటిగా తన స్థాయిని మరింత బలపరుచుకునే దిశగా ఆమె అడుగులు వేస్తోంది.
Recent Random Post:
