టాలీవుడ్ యంగ్ హీరో కిరణ్ అబ్బవరం నటనకు ఈ ఏడాది అవార్డుల పంట ఖాయమని ప్రముఖ నిర్మాత ఎస్.కె.ఎన్ విశ్వాసం వ్యక్తం చేశారు. ఎలాంటి సినీ బ్యాక్గ్రౌండ్ లేకుండా ఇండస్ట్రీలోకి అడుగుపెట్టి, తనకంటూ ప్రత్యేక గుర్తింపు సంపాదించుకున్న కిరణ్.. నటుడిగా మాత్రమే కాకుండా నిర్మాతగా, దర్శకుడిగా కూడా తన ప్రతిభను చాటుకోవాలనే లక్ష్యంతో ముందుకు సాగుతున్నారని ఆయన అన్నారు.
తాజాగా సాయి రాజేష్ దర్శకత్వంలో, ఎస్.కె.ఎన్ నిర్మాణంలో తెరకెక్కుతున్న ‘చెన్నై లవ్ స్టోరి’ చిత్రంలో కిరణ్ అబ్బవరం కెరీర్లోనే అత్యుత్తమ నటనను కనబరిచారని ఎస్.కె.ఎన్ తెలిపారు. ఈ సినిమా విడుదలైన తర్వాత ప్రతిష్టాత్మక సినీ అవార్డుల నామినేషన్లలో కిరణ్ పేరు తప్పకుండా ఉంటుందని ఆయన ధీమా వ్యక్తం చేశారు.
ఒక ఇంటర్వ్యూలో మాట్లాడుతూ, తాము ఊహించిన పాత్రకు కిరణ్ అబ్బవరం వంద శాతం న్యాయం చేశారని ఎస్.కె.ఎన్ ప్రశంసించారు. ఇప్పటివరకు బాయ్ నెక్స్ట్ డోర్ పాత్రలు, మాస్ క్యారెక్టర్లతో ప్రేక్షకులను అలరించిన కిరణ్.. ఈ సినిమాలో మాత్రం మలి ప్రేమ కోసం పోరాడే ఓ భావోద్వేగభరితమైన ప్రేమికుడిగా అద్భుతమైన నటన కనబరిచారని అన్నారు. ఈ చిత్రం ఆయన కెరీర్లో కమర్షియల్గా పెద్ద విజయాన్ని సాధించడమే కాకుండా నటుడిగా కొత్త గుర్తింపును కూడా తీసుకువస్తుందని ఆశాభావం వ్యక్తం చేశారు.
దర్శకుడు సాయి రాజేష్ సినిమాల్లో హీరోయిన్ పాత్రలకు ఎప్పుడూ ప్రత్యేక ప్రాధాన్యం ఉంటుందని, ఈ చిత్రంలో కూడా కథ హీరోయిన్ పాత్రతోనే ప్రారంభమవుతుందని ఎస్.కె.ఎన్ వెల్లడించారు. ఆ పాత్ర కోసం తెలుగు అమ్మాయిలను ప్రోత్సహించాలనే ఉద్దేశంతో శ్రీ గౌరి ప్రియను ఎంపిక చేశామని తెలిపారు. గౌరి ప్రియ తన పాత్రకు పూర్తిస్థాయిలో న్యాయం చేసిందని, ఆమె నటనతో పాటు సినిమాలోని భావోద్వేగాలు ప్రేక్షకులను థియేటర్ల నుంచి బయటకు వచ్చిన తర్వాత కూడా చాలా కాలం వెంటాడతాయని అన్నారు.
గతంలో సాయి రాజేష్-ఎస్.కె.ఎన్ కాంబినేషన్లో వచ్చిన ‘బేబి’ తొలి ప్రేమలోని మాధుర్యాన్ని, బాధను హృదయానికి హత్తుకునేలా చూపించి బ్లాక్బస్టర్ విజయాన్ని అందుకుంది. అయితే జీవితంలో తొలి ప్రేమ విఫలమైతే అంతటితో అంతా ముగిసిపోదని, మళ్లీ ప్రేమ పుడుతుందని, జీవితం ఎప్పుడూ ముందుకు సాగాల్సిందేననే సందేశాన్ని ‘చెన్నై లవ్ స్టోరి’ ద్వారా చెప్పబోతున్నామని మేకర్స్ తెలిపారు.
ఈ సినిమా ఎక్కడా విషాదభరితంగా కాకుండా, ప్రేమ, భావోద్వేగాలు, వినోదం సమతూకంగా మిళితమైన ఎమోషనల్ ఎంటర్టైనర్గా రూపొందిందని వారు వెల్లడించారు. ‘బేబి’ వంటి ఘన విజయానంతరం దాదాపు మూడు సంవత్సరాల పాటు కథపై శ్రద్ధ పెట్టి, తమదైన ముద్ర వేసేలా ఈ చిత్రాన్ని రూపొందించామని ఎస్.కె.ఎన్ చెప్పారు. కిరణ్ అబ్బవరం కెరీర్కు ఇది కీలక మలుపు తిప్పే చిత్రంగా నిలవడమే కాకుండా, కమర్షియల్ విజయం మరియు అవార్డులు రెండింటినీ అందించే సినిమాగా నిలుస్తుందనే నమ్మకాన్ని ఆయన వ్యక్తం చేశారు.
Recent Random Post:
