స్టార్ సింగర్ సునీత ఇటీవల ఉమెన్ రైట్స్, ఫెమినిజంపై చేసిన వ్యాఖ్యలు సోషల్ మీడియాలో పెద్ద ఎత్తున చర్చకు దారితీశాయి. ముఖ్యంగా “మై బాడీ.. మై రైట్” అంశంపై ఆమె చేసిన కామెంట్స్ వైరల్ కావడంతో అనేక మంది భిన్నాభిప్రాయాలు వ్యక్తం చేశారు. ఈ వ్యవహారంపై సింగర్ చిన్మయి స్పందించగా, తాజాగా సునీత మరో వీడియో విడుదల చేసి తన వ్యాఖ్యలపై వివరణ ఇచ్చారు.
ఇటీవల ఓ కార్యక్రమంలో మాట్లాడిన సునీత, ఫెమినిజం అంటే కేవలం నచ్చిన దుస్తులు ధరించడం మాత్రమే కాదని అన్నారు. మహిళలకు తమకు నచ్చిన దుస్తులు ధరించే పూర్తి హక్కు ఉందని చెప్పిన ఆమె, అదే సమయంలో సమాజంలో ఉన్న పరిస్థితులను కూడా దృష్టిలో పెట్టుకుని తమ భద్రతపై జాగ్రత్తలు తీసుకోవడం అవసరమని వ్యాఖ్యానించారు.
ఈ వ్యాఖ్యలపై స్పందించిన చిన్మయి.. సునీతపై తనకు ఎంతో గౌరవం ఉందని చెబుతూనే, ఆమె మాటలు తప్పుగా అర్థమయ్యే అవకాశం ఉందని అభిప్రాయపడ్డారు. చిన్నారుల నుంచి వృద్ధుల వరకు దుస్తులతో సంబంధం లేకుండా లైంగిక వేధింపులకు గురవుతున్న ఘటనలను ఉదాహరణగా ప్రస్తావిస్తూ, మహిళల భద్రతను వారి డ్రెస్సింగ్తో ముడిపెట్టడం సరైన సందేశం కాదని పేర్కొన్నారు. అయితే సునీత ఉద్దేశం వేరే అయి ఉండొచ్చని కూడా ఆమె స్పష్టం చేశారు.
ఈ నేపథ్యంలో సునీత ఇన్స్టాగ్రామ్ స్టోరీలో వీడియో విడుదల చేశారు. చిన్మయిపై తనకు పూర్తి గౌరవం ఉందని పేర్కొన్న ఆమె, “మై బాడీ.. మై రైట్” అనే భావన అర్థం తనకు పూర్తిగా తెలుసని చెప్పారు. మహిళ తన శరీరంపై నిర్ణయం తీసుకునే హక్కును తాను ఎప్పుడూ గౌరవిస్తానని స్పష్టం చేశారు.
అయితే సమాజంలో ఇప్పటికీ మహిళలను తప్పు దృష్టితో చూసే మనస్తత్వం ఉన్నందున, జాగ్రత్తగా ఉండాలని మాత్రమే తాను సూచించానని సునీత వివరించారు. అంతేకానీ మహిళపై చేయి చేసేందుకు లేదా వేధించేందుకు ఎవరికీ హక్కు లేదని ఆమె స్పష్టం చేశారు.
“నా చేతి.. నా ఇష్టం” అంటూ మహిళలపై దాడి చేయాలని చూసే వారి చేతులు విరగ్గొట్టాల్సిందేనని ఆమె ఘాటుగా వ్యాఖ్యానించారు. తాను కూడా గతంలో వేధింపులను ఎదుర్కొన్న బాధితురాలినేనని వెల్లడించిన సునీత, మహిళలపై జరిగే ఎలాంటి అన్యాయాన్నీ సమర్థించనని, లైంగిక వేధింపుల విషయంలో తన వైఖరి ఎప్పటికీ మారదని చెప్పారు.
తాను చేసిన మొత్తం వ్యాఖ్యల్లో కొంత భాగాన్ని మాత్రమే తీసుకుని అపార్థం చేసుకోవద్దని కోరిన సునీత, మహిళల పట్ల సమానత్వం, గౌరవం, వేధింపులపై జీరో టాలరెన్స్ అనే తన విలువలు ఎప్పటికీ మారవని స్పష్టం చేశారు.
ఈ మొత్తం వ్యవహారంలో గమనించదగ్గ విషయం ఏమిటంటే.. సునీత, చిన్మయి ఇద్దరూ వ్యక్తిగత విమర్శలకు దిగకుండా, ఒకరిపై ఒకరు గౌరవాన్ని వ్యక్తం చేస్తూనే తమ అభిప్రాయాలను వెల్లడించారు. అయితే సోషల్ మీడియాలో మాత్రం ఈ అంశంపై చర్చ ఇంకా కొనసాగుతూనే ఉంది.
Recent Random Post:
