నయన్ ఇన్‌స్టా రేంజ్ మామూలు కాదు!

దక్షిణాది చిత్రపరిశ్రమలో లేడీ సూపర్‌స్టార్గా అగ్రస్థానంలో కొనసాగుతున్న నయనతార.. వెండితెరపైనే కాదు, డిజిటల్ ప్రపంచంలోనూ తన సత్తా చాటుతున్నారు. ఇన్‌స్టాగ్రామ్‌లో ఆలస్యంగా అడుగుపెట్టినప్పటికీ, అత్యంత వేగంగా కోట్లాది అభిమానులను సంపాదించి సోషల్ మీడియాలో బలమైన బ్రాండ్‌గా ఎదిగారు. ప్రస్తుతం ఆమెను ఇన్‌స్టాగ్రామ్‌లో 10.4 మిలియన్లకు పైగా అభిమానులు ఫాలో అవుతున్నారు. ఈ భారీ ఫాలోయింగ్ కారణంగా ప్రముఖ కార్పొరేట్ సంస్థలు నయనతారతో బ్రాండ్ ప్రమోషన్ల కోసం పోటీ పడుతున్నట్లు మార్కెట్ వర్గాలు చెబుతున్నాయి.

బ్రాండ్ మార్కెటింగ్ వర్గాల సమాచారం ప్రకారం.. నయనతార ఇన్‌స్టాగ్రామ్‌లో ఒక్కో స్పాన్సర్డ్ పోస్ట్ లేదా రీల్‌కు రూ.20 లక్షల నుంచి రూ.30 లక్షల వరకు పారితోషికం తీసుకుంటున్నారట. ఇక ఏడాది కాలం పాటు కొనసాగే బ్రాండ్ అంబాసిడర్ ఒప్పందాల కోసం రూ.3 కోట్ల నుంచి రూ.5 కోట్ల వరకు ఛార్జ్ చేస్తున్నట్లు సమాచారం. ఈ ఒప్పందాలు కేవలం ఇన్‌స్టాగ్రామ్‌కే పరిమితం కాకుండా, ఎక్స్ (ట్విట్టర్), ఫేస్‌బుక్ తదితర సోషల్ మీడియా ప్లాట్‌ఫారమ్‌లలో ప్రచార కార్యక్రమాలను కూడా కలిగి ఉంటాయని ఇండస్ట్రీ వర్గాలు చెబుతున్నాయి.

సినిమాల విషయానికి వస్తే.. నయనతార ప్రస్తుతం దేశంలోనే అత్యధిక పారితోషికం అందుకుంటున్న హీరోయిన్లలో ఒకరు. ఒక్కో చిత్రానికి రూ.10 కోట్ల నుంచి రూ.15 కోట్ల వరకు రెమ్యునరేషన్ డిమాండ్ చేస్తున్న ఆమె.. లేడీ ఓరియెంటెడ్ సినిమాలు అయినా, కమర్షియల్ చిత్రాలు అయినా నిర్మాతల తొలి ఎంపికగా నిలుస్తున్నారు.

సినిమాలతో పాటు వ్యాపార రంగంలోనూ నయనతార తనదైన ముద్ర వేస్తున్నారు. ఆమె నికర ఆస్తుల విలువ సుమారు రూ.200 కోట్లకు పైగా ఉన్నట్లు అంచనా. ఒక్కో కమర్షియల్ యాడ్‌కు రూ.5 కోట్ల వరకు పారితోషికం తీసుకుంటున్నట్లు ప్రచారం జరుగుతోంది. అంతేకాకుండా తన భర్త విఘ్నేష్ శివన్‌తో కలిసి నిర్వహిస్తున్న ‘రౌడీ పిక్చర్స్’ నిర్మాణ సంస్థ ద్వారా సినిమాలు నిర్మించడంతో పాటు పలు వ్యాపారాల్లో పెట్టుబడులు పెట్టి ఆదాయ వనరులను విస్తరించుకుంటున్నారు. దీంతో నయనతార కేవలం స్టార్ హీరోయిన్ మాత్రమే కాకుండా విజయవంతమైన బిజినెస్ ఉమెన్‌గా కూడా గుర్తింపు పొందుతున్నారు.

ప్రస్తుతం నయనతార పలు ఆసక్తికరమైన ప్రాజెక్టులతో బిజీగా ఉన్నారు. ఆమె ప్రధాన పాత్రలో తెరకెక్కుతున్న రక్కాయి షూటింగ్ దశలో ఉండగా, మన్నంగట్టి సిన్స్ 1960, హాయ్ చిత్రాలు విడుదలకు సిద్ధమవుతున్నాయి. అలాగే సూపర్ హిట్ డివైన్ కామెడీకి సీక్వెల్‌గా వస్తున్న మూకుత్తి అమ్మన్ 2 ప్రస్తుతం పోస్ట్ ప్రొడక్షన్ పనుల్లో బిజీగా ఉంది. వీటితో పాటు మరికొన్ని భారీ పాన్ ఇండియా చిత్రాలకు కూడా నయనతార గ్రీన్ సిగ్నల్ ఇచ్చినట్లు సమాచారం. అయితే ఆ ప్రాజెక్టులపై అధికారిక ప్రకటన రావాల్సి ఉంది.