పవర్ స్టార్, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ సతీమణి అన్నా కొణిదెల గురించి ప్రత్యేకంగా చెప్పాల్సిన అవసరం లేదు. రష్యాకు చెందిన ఆమె భారతీయ సంప్రదాయాలను గౌరవిస్తూ, కుటుంబానికి అత్యంత ప్రాధాన్యత ఇస్తూ అందరి అభిమానాన్ని చూరగొంటున్నారు. ఇటీవలే ఆమె తన పేరుతో ప్రత్యేక ఇన్స్టాగ్రామ్ ఖాతాను ప్రారంభించి, పవన్ కళ్యాణ్కు సంబంధించిన ఎన్నో మధుర జ్ఞాపకాలను అభిమానులతో పంచుకుంటున్నారు.
తాజాగా పవన్ కళ్యాణ్ ఉప ముఖ్యమంత్రిగా ప్రమాణ స్వీకారం చేసి రెండేళ్లు పూర్తైన సందర్భంగా, 2024 జూన్ 12న జరిగిన ఆ వేడుకకు సంబంధించిన వీడియోను మళ్లీ షేర్ చేశారు. “పవన్ అనే నేను…” అంటూ ఆయన చేసిన ప్రమాణ స్వీకారం తనకు ఎంత భావోద్వేగ క్షణమో గుర్తు చేసుకుంటూ, కొన్ని ప్రత్యేక ఫొటోలు, జ్ఞాపకాలను అభిమానులతో పంచుకున్నారు.
జనసేన పార్టీ గుర్తు గ్లాస్ను చేతిలో పట్టుకుని పవన్ కళ్యాణ్తో కలిసి దిగిన ఫొటోలు, అకీరా నందన్, ఆద్యలతో ఉన్న కుటుంబ చిత్రాలు, అలాగే ప్రధాని నరేంద్ర మోదీని మెగా కుటుంబం కలిసిన సందర్భంలోని ఫొటోలను ఆమె ఇన్స్టాగ్రామ్లో పోస్ట్ చేశారు.
ఈ సందర్భంగా పవన్ కళ్యాణ్ విజయానికి వెనుక ఉన్న ఎన్నో కష్టాలను గుర్తు చేసుకుంటూ అన్నా భావోద్వేగ వ్యాఖ్యలు చేశారు. “ప్రజలు మీ విజయాన్ని చూస్తారు. కానీ దాని వెనుక మీరు పడిన సంవత్సరాల శ్రమ, ఎదుర్కొన్న అవమానాలు, అనిశ్చితి, బాధలు చాలా కొద్దిమందికే తెలుసు. ప్రపంచమంతా మీకు వ్యతిరేకంగా ఉన్నట్లు అనిపించిన రోజులను నేను చూశాను. చాలా మంది మిమ్మల్ని ప్రశ్నించారు, ఎగతాళి చేశారు. కానీ మీరు నమ్మిన దాని కోసం ఎప్పుడూ వెనక్కి తగ్గలేదు” అని పేర్కొన్నారు.
“మీరు బయట పోరాడుతుంటే, నేను ఇంట్లో పిల్లల కోసం ధైర్యంగా ఉండడానికి ప్రయత్నించాను. కొన్ని సందర్భాల్లో నేనూ కుప్పకూలిపోవాలనుకున్నాను. అయినా కూడా మనం ముందుకు సాగాము. అది సులభం కాబట్టి కాదు, మన మనస్సాక్షికి ద్రోహం చేయలేకపోయాం కాబట్టి” అని ఆమె వెల్లడించారు.
పవన్ కళ్యాణ్ విజయం తనకు రాజకీయ విజయంగా కాకుండా, ఒక మనిషి పట్టుదల, నిజాయితీకి దక్కిన గౌరవంగా అనిపించిందని అన్నా చెప్పారు. “ఆ క్షణంలో నా కళ్లలో ఆనందబాష్పాలు వచ్చాయి. నేను ఏడుస్తున్నానని మోదీ జీ కూడా గమనించారు. అవి స్వచ్ఛమైన ఆనందానికి గుర్తులు. కొన్నిసార్లు దేవుడు మనుషులను పరీక్షిస్తాడు. కానీ చివరికి వారి గౌరవాన్ని ప్రపంచం ముందు తిరిగి నిలబెడతాడు” అని పేర్కొన్నారు.
చివరగా పవన్ కళ్యాణ్ను ట్యాగ్ చేస్తూ, “ఎప్పుడూ వదులుకోని ఆ వ్యక్తి పట్ల నాకు ఎంతో గర్వంగా ఉంది. నిన్ను చూసి చాలా గర్వపడుతున్నాను” అంటూ తన మనసులోని భావాలను అభిమానులతో పంచుకున్నారు.
Recent Random Post:
