టాలీవుడ్లో జూనియర్ ఆర్టిస్టుగా కెరీర్ ప్రారంభించి, ఆ తర్వాత స్టార్ హీరోలతో భారీ సినిమాలు నిర్మించే స్థాయికి ఎదిగిన నిర్మాత బండ్ల గణేష్ మరోసారి తన వ్యాఖ్యలతో వార్తల్లో నిలిచారు. పవన్ కళ్యాణ్, జూనియర్ ఎన్టీఆర్, అల్లు అర్జున్, రామ్ చరణ్ వంటి అగ్ర హీరోలతో సినిమాలు నిర్మించి ప్రత్యేక గుర్తింపు తెచ్చుకున్న ఆయన, ఇటీవల నటుడు రాజా రవీంద్రతో చేసిన పాడ్కాస్ట్లో తన నిర్మాణ ప్రయాణంపై ఆసక్తికర విషయాలు వెల్లడించారు.
సినిమా నిర్మాణం తనకు వ్యాపారమే తప్ప కేవలం పేరు, ప్రతిష్ట కోసం కాదని బండ్ల గణేష్ స్పష్టం చేశారు. “నేను సినిమా తీస్తే డబ్బులు మిగలాలి. డబ్బులు పోగొట్టుకోవడానికి లేదా ఎవరి మెప్పు పొందడానికి సినిమా తీయను. నేను తీసిన ఏ సినిమాతోనూ నష్టం రాలేదు. ‘తీన్ మార్’ సినిమాతో కూడా నాకు లాభమే వచ్చింది” అని ఆయన వ్యాఖ్యానించారు. సినిమా నిర్మాణంలో నష్టాలు రావడం వ్యాపార పరంగా తప్పని, దాన్ని తాను పెద్ద నేరంలా భావిస్తానని తెలిపారు.
ఇండస్ట్రీలో తనకంటే తెలివైన నిర్మాతలు చాలామంది ఉన్నారని, వారు నష్టపోయినా దానికి తమకు తెలియని వ్యాపార కారణాలు ఉండొచ్చని ఆయన అన్నారు. అయితే తాను మాత్రం లాభం లేకుండా సినిమా చేయనని మరోసారి స్పష్టం చేశారు. ఈ వ్యాఖ్యలు ఇప్పుడు సోషల్ మీడియాలో వైరల్గా మారాయి.
నటుడిగా ఇండస్ట్రీలో అడుగుపెట్టిన బండ్ల గణేష్, 2009లో వచ్చిన ‘ఆంజనేయులు’ సినిమాతో నిర్మాతగా మారారు. రవితేజ హీరోగా తెరకెక్కిన ఆ సినిమా యావరేజ్ రిజల్ట్ సాధించినప్పటికీ, నిర్మాతగా ఆయనకు మంచి గుర్తింపు తీసుకొచ్చింది. ఆ తర్వాత పవన్ కళ్యాణ్తో చేసిన ‘తీన్ మార్’ బాక్సాఫీస్ వద్ద ఆశించిన విజయం సాధించకపోయినా, ఆ సినిమాతో కూడా తాను నష్టపోలేదని ఇప్పుడు ఆయన చెబుతున్నారు.
అయితే ఆయన కెరీర్ను మలుపు తిప్పిన సినిమా మాత్రం ‘గబ్బర్ సింగ్’. 2012లో విడుదలైన ఈ చిత్రం ఇండస్ట్రీ హిట్గా నిలిచి భారీ వసూళ్లు సాధించింది. ఇది పవన్ కళ్యాణ్ కెరీర్తో పాటు బండ్ల గణేష్ కెరీర్లో కూడా కీలక మైలురాయిగా మారింది. ఈ విజయం తర్వాత ఆయన టాలీవుడ్లో టాప్ ప్రొడ్యూసర్ల జాబితాలో చేరిపోయారు.
‘గబ్బర్ సింగ్’ తర్వాత జూనియర్ ఎన్టీఆర్తో ‘బాద్షా’, ‘టెంపర్’, అల్లు అర్జున్తో ‘ఇద్దరమ్మాయిలతో’, రామ్ చరణ్తో ‘గోవిందుడు అందరివాడేలే’ వంటి భారీ చిత్రాలను నిర్మించారు. వీటిలో కొన్ని సూపర్ హిట్లు కాగా, మరికొన్ని యావరేజ్ ఫలితాలు సాధించాయి. అయినప్పటికీ ఆర్థికంగా నష్టం రాలేదని బండ్ల గణేష్ పేర్కొనడం చర్చనీయాంశంగా మారింది.
2015లో వచ్చిన ‘టెంపర్’ తర్వాత ఆయన సినిమా నిర్మాణానికి దూరమయ్యారు. అప్పటి నుంచి రాజకీయాలు, టీవీ షోలు, సోషల్ మీడియా వ్యాఖ్యలతో ఎక్కువగా వార్తల్లో నిలుస్తున్నారు. ఇటీవల ఆయన వ్యాఖ్యలు చూస్తుంటే మళ్లీ సినిమాల నిర్మాణంలోకి వచ్చే అవకాశాలు ఉన్నాయనే చర్చ కూడా నడుస్తోంది. అయితే కొత్త ప్రాజెక్టుపై ఇప్పటివరకు అధికారిక ప్రకటన వెలువడలేదు.
Recent Random Post:
