భారీ బడ్జెట్ సినిమాలు నిజంగానే తమ పెట్టుబడిని పూర్తిగా తిరిగి తెచ్చుకుంటున్నాయా? వందల కోట్ల కలెక్షన్లు సాధించిన చిత్రాలు కూడా వాస్తవంగా లాభాల్లో ఉన్నాయా? ప్రస్తుతం టాలీవుడ్లో ఈ ప్రశ్నలే చర్చనీయాంశంగా మారాయి. దీనికి కారణం దర్శకుడు అభిషేక్ నామా చేసిన తాజా వ్యాఖ్యలే.
జూలై 3న ప్రపంచవ్యాప్తంగా విడుదల కానున్న నాగబంధం: ది సీక్రెట్ ట్రెజర్ ట్రైలర్ లాంచ్ కార్యక్రమంలో మాట్లాడిన అభిషేక్ నామా, సినిమా విజయాలు, అపజయాలపై ఆసక్తికర వ్యాఖ్యలు చేశారు. “ఏ సినిమాకు గ్యారెంటీ ఉంటుంది? నేనే ‘శ్రీమంతుడు’ చేశాను, నేనే ‘బ్రహ్మోత్సవం’ కూడా చేశాను. సినిమాల విషయంలో లాజిక్ ఉండదు. ఒకప్పుడు మినిమమ్ గ్యారెంటీ అనే మాట ఉండేది. ఇప్పుడు ఎంత పెద్ద సినిమా అయినా గ్యారెంటీ లేదు” అని ఆయన అన్నారు.
అంతేకాదు, ప్రస్తుతం భారీ బడ్జెట్ చిత్రాల పరిస్థితిపై కూడా ఆయన పరోక్షంగా స్పందించారు. “పూర్తిగా రికవరీ అయిన ఒక పెద్ద సినిమా పేరు చెప్పండి” అంటూ ప్రశ్నించడం ద్వారా ఇండస్ట్రీలో పెరుగుతున్న నిర్మాణ వ్యయాలపై తన ఆందోళనను వ్యక్తం చేసినట్లు కనిపించింది.
ఈ వ్యాఖ్యలు నాగబంధం సినిమా బడ్జెట్ నేపథ్యంలో మరింత ప్రాధాన్యం సంతరించుకున్నాయి. ఈ చిత్రం కోసం రూ.100 కోట్ల నుంచి రూ.130 కోట్ల వరకు ఖర్చు చేసినట్లు ప్రచారం జరుగుతోంది. మొదట అనుకున్న అంచనాలను మించి నాలుగు నుంచి ఐదు రెట్లు బడ్జెట్ పెరిగినట్లు సమాచారం. రామానాయుడు స్టూడియోస్లో వేసిన భారీ సెట్లు, విజువల్ ఎఫెక్ట్స్, యాక్షన్ ఎపిసోడ్లు ఇందుకు ప్రధాన కారణాలుగా చెబుతున్నారు.
ప్రత్యేకంగా స్టంట్ కొరియోగ్రాఫర్ కేచా ఖంఫక్డీ రూపొందించిన క్లైమాక్స్ యాక్షన్ సీక్వెన్స్కే దాదాపు రూ.20 కోట్లు ఖర్చు చేసినట్లు సమాచారం. అలాగే అనంత పద్మనాభస్వామి ఆలయాన్ని పోలి ఉండే భారీ సెట్తో పాటు, ఒక పాట చిత్రీకరణ కోసం మరో రూ.10 కోట్లు వెచ్చించినట్లు తెలుస్తోంది.
ఇక ఆసక్తికర విషయం ఏమిటంటే, ఈ చిత్రంలో హీరోగా నటిస్తున్న విరాట్ కర్ణకు ఇప్పటికీ పెద్ద స్టార్ ఇమేజ్ లేదు. అయినప్పటికీ టీజర్, ట్రైలర్కు వచ్చిన స్పందనతో సినిమాపై మంచి అంచనాలు ఏర్పడ్డాయి. దీంతో ఈ భారీ బడ్జెట్ను చిత్రం ఎలా రికవరీ చేస్తుందనే అంశంపై కూడా చర్చ సాగుతోంది.
ఇదే సమయంలో అభిషేక్ నామా చేసిన వ్యాఖ్యలు సోషల్ మీడియాలో విభిన్న అభిప్రాయాలకు దారితీశాయి. కొందరు ఆయన మాటల్లో వాస్తవం ఉందని, పెరుగుతున్న బడ్జెట్ల కారణంగా లాభాలు కనిపించడం కష్టమైందని అభిప్రాయపడుతుండగా, మరికొందరు ఇటీవల విడుదలైన కొన్ని పాన్ ఇండియా చిత్రాలు భారీ లాభాలు అందుకున్నాయని గుర్తు చేస్తున్నారు.
ఏదేమైనా, నాగబంధం ట్రైలర్తో పాటు అభిషేక్ నామా చేసిన ఈ వ్యాఖ్యలు కూడా సినిమాకు అదనపు ప్రచారాన్ని తీసుకొచ్చాయి. భారీ అంచనాల మధ్య వస్తున్న ఈ చిత్రం బాక్సాఫీస్ వద్ద ఎలాంటి ఫలితాన్ని సాధిస్తుందో చూడాలి.
Recent Random Post:
