ప్రస్తుతం బాలీవుడ్లో ఫిట్నెస్ ఐకాన్లలో ఒకరిగా గుర్తింపు పొందిన సారా అలీ ఖాన్ ఒకప్పుడు తీవ్ర ఊబకాయంతో బాధపడిందంటే చాలామందికి ఆశ్చర్యమే. తన క్రమశిక్షణ, కఠినమైన డైట్, నిరంతర వ్యాయామంతో అద్భుతమైన శారీరక మార్పును సాధించిన సారా.. తాజాగా తన కాలేజ్ రోజుల ఆహారపు అలవాట్ల గురించి ఆసక్తికర విషయాలను వెల్లడించారు.
న్యూయార్క్లో చదువుకునే సమయంలో ఆరోగ్యకరమైన ఆహారం కంటే చౌకగా దొరికే ఫుడ్ ఆఫర్లకే ఎక్కువ ప్రాధాన్యత ఇచ్చేదాన్నని సారా తెలిపారు. ఇటీవల ఓ ఇంటర్వ్యూలో మాట్లాడిన ఆమె.. అప్పట్లో తన జీవితం పిజ్జాలు, చాక్లెట్ బ్రౌనీల చుట్టూనే తిరిగేదని సరదాగా గుర్తు చేసుకున్నారు.
“ఒక లార్జ్ పిజ్జా కొనడం కంటే రెండు మీడియం పిజ్జాలు కొనడం తక్కువ ఖర్చుతో ఉండేది. ఒక మీడియం పిజ్జా కొంటే రెండోది 50 శాతం తగ్గింపుతో వచ్చేది. ఆ ఆఫర్ చూసి ప్రతిరోజూ రెండు మీడియం పిజ్జాలు ఆర్డర్ చేయడం మంచి డీల్ అనుకునేదాన్ని. కానీ ఆ ఆఫర్తో పాటు నా బరువు కూడా 50 శాతం పెరుగుతుందనే విషయం అప్పుడు అర్థం కాలేదు” అంటూ సారా నవ్వుతూ చెప్పుకొచ్చారు.
పిజ్జాలతో పాటు తన బ్రేక్ఫాస్ట్ కూడా అంతే ఆశ్చర్యకరంగా ఉండేదని ఆమె వెల్లడించారు. ప్రతిరోజూ ఉదయం మూడు చాక్లెట్ చిప్ బ్రౌనీలు తినడం తనకు అలవాటని తెలిపారు. “కెఫెటీరియా నుంచి క్లాస్రూమ్కు వెళ్లడానికి ఐదు నుంచి ఏడు నిమిషాల సమయం పట్టేది. ఆ నడకలోనే మూడు బ్రౌనీలు తినేసేదాన్ని. ఇది సరదాగా చెబుతున్న విషయం కాదు” అని పేర్కొన్నారు.
వెనక్కి తిరిగి చూసుకుంటే తాను ఏమి తింటున్నానో, ఎంత తింటున్నానో కూడా ఆలోచించకుండా తినేసేదాన్నని సారా అంగీకరించారు. అయితే సినిమాల్లోకి రావాలనే లక్ష్యంతో తన జీవనశైలిని పూర్తిగా మార్చుకున్నట్లు తెలిపారు.
దివంగత నటుడు సుశాంత్ సింగ్ రాజ్పుత్తో కలిసి నటించిన కేదార్నాథ్ సినిమాతో బాలీవుడ్లోకి అడుగుపెట్టే ముందు సారా దాదాపు 45 కిలోల బరువు తగ్గడం విశేషం. కఠినమైన డైట్, రెగ్యులర్ వర్కౌట్స్, పట్టుదలతో ఆమె ఈ అద్భుతమైన మార్పును సాధించారు.
ఒకప్పుడు 100 కిలోల బరువుకు చేరుకున్న సారా అలీ ఖాన్.. ఇప్పుడు ఫిట్నెస్కు ప్రతీకగా నిలుస్తున్నారు. తన ప్రయాణంలో చేసిన పొరపాట్లు, ఎదుర్కొన్న సవాళ్ల గురించి ఓపెన్గా మాట్లాడటం ద్వారా ఎంతోమందికి స్ఫూర్తిగా నిలుస్తున్నారు. సాధారణ అమ్మాయి నుంచి బాలీవుడ్ ఫిట్నెస్ స్టార్గా ఎదిగిన సారా కథ నిజంగా ప్రశంసనీయమే.
Recent Random Post:
