పుష్కర కాలానికి పైగా సరైన భారీ విజయాన్ని ఎదురుచూస్తున్న తమిళ స్టార్ హీరో Suriyaకి ‘కరుప్పు’ సినిమా ఊరటనిచ్చింది. తమిళంలో బ్లాక్బస్టర్ దిశగా దూసుకెళ్తున్న ఈ చిత్రం, తెలుగులో మిక్స్డ్ టాక్ వచ్చినప్పటికీ మంచి వసూళ్లు రాబడుతోంది. ముఖ్యంగా వీకెండ్ తర్వాత కూడా తమిళనాడులో ఈ సినిమాకు స్ట్రాంగ్ కలెక్షన్స్ కొనసాగుతుండటం విశేషం.
అయితే సినిమా విజయవంతంగా రన్ అవుతున్న సమయంలోనే ఒక వివాదం ‘కరుప్పు’ టీమ్ను ఇబ్బందుల్లోకి నెట్టింది. ఈ చిత్రంలో లెజెండరీ సంగీత దర్శకుడు Ilaiyaraajaను ఉద్దేశిస్తూ సెటైరికల్ డైలాగ్ పెట్టారంటూ సోషల్ మీడియాలో విమర్శలు వెల్లువెత్తాయి.
సినిమా సెకండాఫ్లో ఒక సందర్భంలో పాత Vijayakanth పాట వినిపించే సీన్ ఉంటుంది. అదే సమయంలో ఇళయరాజా కాపీరైట్ వ్యవహారాలపై పరోక్షంగా వ్యాఖ్య చేసే డైలాగ్ను సినిమాలో చేర్చినట్లు ప్రేక్షకులు గుర్తించారు. ఇటీవల తన పాటల వినియోగంపై ఇళయరాజా నోటీసులు పంపడం, కేసులు వేయడం చర్చనీయాంశమైన సంగతి తెలిసిందే. ఇదే అంశాన్ని ఆధారంగా చేసుకుని సినిమాలో సెటైర్ వేసినట్లు అభిమానులు అభిప్రాయపడ్డారు.
దీంతో ఇళయరాజా అభిమానులు తీవ్ర ఆగ్రహం వ్యక్తం చేశారు. “ఇలాంటి సంగీత దిగ్గజాన్ని ఇలా టార్గెట్ చేయడం సరైంది కాదు” అంటూ సోషల్ మీడియాలో మండిపడ్డారు. ఈ డైలాగ్ కారణంగా ఇళయరాజా కూడా అసంతృప్తికి గురయ్యారని వార్తలు రావడంతో ‘కరుప్పు’ టీమ్ వెంటనే స్పందించింది.
తాజాగా చిత్రబృందం అధికారిక ప్రకటన విడుదల చేస్తూ క్షమాపణలు తెలిపింది. “ఇళయరాజా గారంటే మాకు ఎంతో గౌరవం ఉంది. ఆయన భారతీయ సినీ సంగీతానికి చేసిన సేవలు తరతరాలకు స్ఫూర్తి. ‘కరుప్పు’ సినిమాలోని ఒక డైలాగ్ వల్ల ఆయన మనోభావాలు దెబ్బతిన్నాయని తెలిసి మేము బాధపడ్డాం. ఆయన్ని అవమానించే ఉద్దేశం మా వద్ద లేదు. అందుకే ఆ డైలాగ్ను చిత్రంలో నుంచి తొలగిస్తున్నాం. ఈ సందర్భంగా ఆయనకు క్షమాపణలు కూడా చెబుతున్నాం” అని టీమ్ వెల్లడించింది.
సినిమా మంచి విజయాన్ని అందుకుంటున్న సమయంలో వచ్చిన ఈ వివాదం ప్రస్తుతం కోలీవుడ్లో హాట్ టాపిక్గా మారింది.
Recent Random Post:
