ప్రముఖ సీనియర్ నటి సుకన్యకు దాదాపు మూడు దశాబ్దాల సుదీర్ఘ న్యాయపోరాటం అనంతరం కోర్టులో ఊరట లభించింది. 30 ఏళ్లుగా కొనసాగుతున్న పరువు నష్టం కేసులో మద్రాస్ హైకోర్టు తాజాగా ఆమెకు అనుకూలంగా తీర్పు వెలువరించింది. ఈ కేసులో ముందుగా దిగువ కోర్టు ఇచ్చిన తీర్పును సమర్థిస్తూ, సన్ టీవీ నెట్వర్క్కు రూ.10.01 లక్షల పరిహారం చెల్లించాలన్న ఆదేశాలను హైకోర్టు నిలబెట్టింది.
ఈ వివాదం 1996లో సన్ టీవీలో ప్రసారమైన ‘నెరుక్కు నేర్’ కార్యక్రమంతో ప్రారంభమైంది. ఆ కార్యక్రమంలో గంధపు చెక్కల స్మగ్లర్ వీరప్పన్ ఇచ్చిన ఇంటర్వ్యూను టెలికాస్ట్ చేయగా, అందులో నటి సుకన్య వ్యక్తిత్వాన్ని దెబ్బతీసేలా ఉన్న కొన్ని వ్యాఖ్యలు ప్రసారమయ్యాయని ఆమె ఆరోపించారు. తన పరువుకు భంగం కలిగించే విధంగా కంటెంట్ ప్రసారమైందని పేర్కొంటూ ఆమె అప్పట్లోనే పరువు నష్టం దావా దాఖలు చేశారు.
దీర్ఘకాల విచారణ అనంతరం 2015లో దిగువ కోర్టు సుకన్యకు అనుకూలంగా తీర్పు ఇచ్చి, పరిహారం చెల్లించాలని సన్ టీవీని ఆదేశించింది. అయితే ఈ తీర్పును సవాల్ చేస్తూ సన్ టీవీ యాజమాన్యం మద్రాస్ హైకోర్టును ఆశ్రయించింది.
తాజాగా ఈ అప్పీల్పై విచారణ జరిపిన హైకోర్టు, దిగువ కోర్టు తీర్పు సరైనదేనని స్పష్టం చేస్తూ సన్ టీవీ పిటిషన్ను కొట్టివేసింది. ప్రసారం చేసే కంటెంట్లో పరువు నష్టం కలిగించే అంశాలు ఉన్నాయా లేదా అన్నది పరిశీలించే బాధ్యత మీడియా సంస్థలదేనని కోర్టు పునరుద్ఘాటించింది.
ఇంటర్వ్యూను టెలికాస్ట్ చేసే సమయంలో ఎడిటింగ్పై పూర్తి నియంత్రణ ఛానెల్కే ఉందని గుర్తు చేసిన కోర్టు, అభ్యంతరకర భాగాలను తొలగించే అవకాశం ఉన్నప్పటికీ అలా చేయకపోవడాన్ని తప్పుబట్టింది. అందువల్ల సుకన్యకు నిర్ణయించిన పరిహారం చెల్లించాల్సిందేనని స్పష్టం చేసింది.
దాదాపు 30 ఏళ్ల నిరీక్షణ తర్వాత వచ్చిన ఈ తీర్పుతో నటి సుకన్యకు న్యాయం లభించిందని భావిస్తున్నారు. సినిమా వర్గాలు ఈ తీర్పును స్వాగతిస్తూ, ఆలస్యమైనా నిజాయితీ గెలిచిందని అభిప్రాయపడుతున్నాయి. అలాగే రేటింగ్స్ కోసం బాధ్యతారహితంగా ప్రసారాలు చేస్తే కోర్టులు సహించవని ఈ తీర్పు స్పష్టమైన సందేశాన్ని ఇచ్చిందని విశ్లేషకులు పేర్కొంటున్నారు.
Recent Random Post:
