సినిమాల్లో స్పెషల్ లేదా ఐటమ్ సాంగ్ చేయడం అనేది పైకి కనిపించినంత సులభమైన విషయం కాదు. కేవలం కొన్ని రోజుల షూటింగ్ కోసం భారీ పారితోషికం అందుకోవడం మాత్రమే కాదు, ప్రేక్షకులను ఆకట్టుకునేలా ప్రదర్శన ఇవ్వాలనే బాధ్యత కూడా నటీమణులపై ఉంటుంది. ముఖ్యంగా గతంలో హిట్ అయిన స్పెషల్ సాంగ్స్తో పోల్చి చూసే ప్రేక్షకుల అంచనాలను అందుకోవడం ప్రతి హీరోయిన్కు పెద్ద సవాలే.
ప్రస్తుతం అలాంటి సవాల్నే ఎదుర్కొంటోంది టాలీవుడ్ అందాల భామ నభా నటేష్. మాస్ మహారాజా రవితేజ నటిస్తున్న తాజా చిత్రం ఇరుముడిలో ఆమె ఓ ప్రత్యేక గీతంలో కనిపించనున్నట్లు సమాచారం. ఈ వార్త ఇప్పటికే సినీ వర్గాల్లో ఆసక్తిని రేకెత్తిస్తోంది.
రవితేజ సినిమాల్లో స్పెషల్ సాంగ్ అంటే ప్రేక్షకుల్లో ప్రత్యేక అంచనాలు ఉంటాయి. ఆయన ఎనర్జీకి తగ్గట్టుగా స్టెప్పులు వేయడం, స్క్రీన్ ప్రెజెన్స్తో ఆకట్టుకోవడం అంత తేలిక కాదు. గతంలో బలుపు చిత్రంలో శ్రుతిహాసన్, ఈగిల్లో కావ్య థాపర్ తమ ఎనర్జిటిక్ పెర్ఫార్మెన్స్తో ప్రేక్షకులను అలరించారు. అలాగే అన్వేషి జైన్, ఆషికా రంగనాథ్ వంటి నటీమణులు కూడా తమ స్పెషల్ నంబర్లతో మంచి గుర్తింపు తెచ్చుకున్నారు.
అలాంటి ట్రాక్ రికార్డ్ మధ్య నభా నటేష్ ఎలాంటి మ్యాజిక్ చేయబోతుందన్న ఆసక్తి అభిమానుల్లో నెలకొంది. ఇస్మార్ట్ శంకర్ వంటి చిత్రాల్లో ఆమె డ్యాన్స్లు, స్క్రీన్ ఎనర్జీ ఇప్పటికే ప్రేక్షకుల ప్రశంసలు అందుకున్నాయి. అందుకే ఈ స్పెషల్ సాంగ్లో కూడా నభా తనదైన స్టైల్తో మెప్పిస్తుందనే అంచనాలు వ్యక్తమవుతున్నాయి.
ఇక ఇరుముడి చిత్ర షూటింగ్ ప్రస్తుతం శరవేగంగా సాగుతోంది. ఆగస్టు 21న సినిమాను విడుదల చేయనున్నట్లు మేకర్స్ ఇప్పటికే ప్రకటించారు. ఇటీవల విడుదలైన ఫస్ట్ గ్లింప్స్ సినిమాపై మంచి బజ్ను క్రియేట్ చేసింది. ఈ చిత్రంలో రవితేజ అయ్యప్ప మాలధారిగా కనిపించనుండటం, కూతురితో ఉండే ఎమోషనల్ బాండింగ్ కథలో కీలక అంశాలుగా నిలవనున్నట్లు తెలుస్తోంది.
సెంటిమెంట్తో పాటు యాక్షన్కు కూడా సమాన ప్రాధాన్యం ఉన్న ఈ చిత్రంలో స్పెషల్ సాంగ్ అదనపు ఆకర్షణగా ఉండనుంది. ప్రత్యేకంగా రూపొందించిన భారీ సెట్లో రవితేజ, నభా నటేష్లపై ఈ పాటను చిత్రీకరించనున్నట్లు సమాచారం.
వైవిధ్యమైన కథాంశంతో రూపొందుతున్న ఈ చిత్రానికి శివ నిర్వాణ దర్శకత్వం వహిస్తున్నారు. ప్రియా భవానీ శంకర్ హీరోయిన్గా నటిస్తుండగా, మైత్రీ మూవీ మేకర్స్ ప్రతిష్టాత్మకంగా నిర్మిస్తోంది. జి.వి. ప్రకాష్ కుమార్ సంగీతం అందిస్తున్న ఈ క్రేజీ ప్రాజెక్ట్లో నభా నటేష్ స్పెషల్ సాంగ్ సినిమాకు మరింత హైప్ తీసుకురావడం ఖాయమనే అభిప్రాయాలు వ్యక్తమవుతున్నాయి.
Recent Random Post:
