భారతీయ సినీ చరిత్రలో అత్యుత్తమ నటుల్లో ఒకరిగా, వినూత్న ఆలోచనలతో ముందుకు సాగే దర్శకుడిగా ఉలగనాయగన్ కమల్ హాసన్కు ప్రత్యేక స్థానం ఉంది. ఆయన ఏ ప్రాజెక్ట్ను ప్రకటించినా భారీ అంచనాలు ఏర్పడటం సహజం. అయితే కమల్ కెరీర్లో తెరకెక్కిన చిత్రాల కంటే, వివిధ కారణాలతో ఆగిపోయిన డ్రీమ్ ప్రాజెక్ట్లు కూడా సినీ వర్గాల్లో ఆసక్తికర చర్చలకు దారి తీస్తుంటాయి.
అలాంటి ఎన్నో ఏళ్ల కలల ప్రాజెక్ట్లలో ఒకటి చివరకు థగ్ లైఫ్ రూపంలో ప్రేక్షకుల ముందుకు వచ్చింది. బాక్సాఫీస్ వద్ద ఆశించిన విజయాన్ని అందుకోలేకపోయిన ఈ చిత్రం వెనుక కమల్ హాసన్ దశాబ్దాలుగా మోస్తున్న ఒక కల దాగి ఉందన్న విషయం చాలా మందికి తెలియదు.
ఈ కథకు మూలం 2000వ దశకం చివర్లోనే పడింది. అప్పట్లో తలైవన్ ఇరుక్కిరాన్ పేరుతో ఈ ప్రాజెక్ట్ను రూపొందించాలని కమల్ భావించారు. బాలీవుడ్ దిగ్గజం రిషి కపూర్, టాలీవుడ్ స్టార్ వెంకటేష్, మాలీవుడ్ సూపర్ స్టార్ మోహన్లాల్లతో భారీ తారాగణాన్ని సిద్ధం చేయాలన్నది ఆయన ఆలోచన. కానీ అనివార్య కారణాలతో ఆ ప్రయత్నం ముందుకు సాగలేదు.
దీంతో వెంకటేష్, మోహన్లాల్ ఇచ్చిన డేట్స్ను ఉపయోగించుకుని కమల్ హాసన్, చక్రి తోలేటి దర్శకత్వంలో ఉన్నైపోల్ ఒరువన్ (తెలుగులో ఈనాడు) చిత్రాన్ని నిర్మించారు.
అయితే కమల్ తన డ్రీమ్ ప్రాజెక్ట్ను మాత్రం వదిలిపెట్టలేదు. 2012లో నిర్మాత ఆస్కార్ రవిచంద్రన్ నిర్మాణంలో, కత్రినా కైఫ్ కథానాయికగా ఈ చిత్రాన్ని మళ్లీ ప్రారంభించాలని ప్రయత్నించారు. ఒక దశలో కమల్ హాసనే స్వయంగా దర్శకత్వం వహిస్తారని కూడా ప్రచారం జరిగింది. కానీ ఆ ప్రయత్నం కూడా ఫలించలేదు.
2015లో మరోసారి తలైవన్ ఇరుక్కిరాన్ పేరుతో తమిళంలో, అమర్ హై పేరుతో హిందీలో ద్విభాషా చిత్రంగా తెరకెక్కించే ప్రయత్నాలు జరిగాయి. బాలీవుడ్ నటుడు సైఫ్ అలీ ఖాన్ కీలక పాత్రలో నటించేందుకు అంగీకరించగా, కమల్ హాసన్ స్వయంగా ఈ ప్రాజెక్ట్ త్వరలో ప్రారంభమవుతుందని ప్రకటించారు. కానీ ఆ దశలో కూడా ఈ సినిమా కార్యరూపం దాల్చలేదు.
ఇలా ఎన్నో సంవత్సరాల పాటు అనేక రూపాల్లో ప్రయాణించిన ఈ కథ చివరకు కమల్ హాసన్ తన ప్రాణ స్నేహితుడు, దిగ్గజ దర్శకుడు మణిరత్నంకు అప్పగించారు. అలా వీరిద్దరి కలయికలో థగ్ లైఫ్ తెరకెక్కింది.
అయితే భారీ అంచనాల మధ్య విడుదలైన ఈ చిత్రం ప్రేక్షకులను ఆశించిన స్థాయిలో ఆకట్టుకోలేకపోయింది. బాక్సాఫీస్ వద్ద కూడా నిరాశపరిచింది. సాధారణ ప్రేక్షకులకు ఇది ఒక డిజాస్టర్ మూవీగా మాత్రమే గుర్తుండిపోయినా, వాస్తవానికి ఇది కమల్ హాసన్ దశాబ్దాలుగా గుండెల్లో పెట్టుకున్న కల.
అయితే ఈ కథను మణిరత్నంకు అప్పగించకుండా కమల్ హాసన్ స్వయంగా తెరకెక్కించి ఉంటే ఫలితం వేరేలా ఉండేదేమో అన్న అభిప్రాయం కూడా సినీ వర్గాల్లో వినిపిస్తోంది. అంతేకాదు, థగ్ లైఫ్ అనే టైటిల్కు తగ్గట్టుగా కథనం సాగలేదన్న విమర్శలు కూడా వచ్చాయి. టైటిల్ సూచించిన స్థాయి, అంచనాలకు సరిపడే కంటెంట్ను అందించడంలో మణిరత్నం విఫలమయ్యారనే అభిప్రాయం పలువురిలో వ్యక్తమవుతోంది.
విజయం సాధించలేకపోయినా, థగ్ లైఫ్ వెనుక ఉన్న కమల్ హాసన్ కల, ఆ ప్రాజెక్ట్ చేసిన సుదీర్ఘ ప్రయాణం మాత్రం భారతీయ సినీ చరిత్రలో ఒక ఆసక్తికర అధ్యాయంగా మిగిలిపోతుంది.
Recent Random Post:
