వివాదాస్పద దర్శకుడు Ram Gopal Varma మరోసారి తన భావోద్వేగాలతో అభిమానులను కదిలించారు. ఈసారి ఆయన మాటల్లో కనిపించిన ఆవేదన, ప్రేమ, కోపం అన్నీ ఒకే వ్యక్తి చుట్టూ తిరిగాయి. ఆ వ్యక్తి మరెవరో కాదు.. పాప్ ప్రపంచాన్ని శాసించిన లెజెండ్ Michael Jackson.
“అది ఒక పీడకల.. నా గుండె ఆగిపోయేలా చేసిన రోజు.. నా కలలను ఛిద్రము చేసిన రోజు” అంటూ ఆర్జీవీ తాజాగా సోషల్ మీడియా వేదికగా పంచుకున్న సుదీర్ఘ లేఖ ఇప్పుడు సినీ, సంగీత వర్గాల్లో వైరల్గా మారింది. మైఖేల్ బయోపిక్ చూసిన అనంతరం తనలో దాచుకున్న ఎన్నో జ్ఞాపకాలను ఆయన బయటపెట్టారు.
1984 జనవరి 2న విజయవాడలోని ఒక చిన్న వీడియో పార్లర్లో తొలిసారి థ్రిల్లర్ ఆల్బమ్ చూసిన క్షణాన్ని వర్మ ఎంతో ఎమోషనల్గా గుర్తుచేసుకున్నారు. ఆ చీకటి గదిలో టీవీ స్క్రీన్పై కనిపించిన మైఖేల్ జాక్సన్ తనకు సాధారణ కళాకారుడిలా కాకుండా.. మానవ రూపంలో భూమిపైకి దిగివచ్చిన ఓ అలౌకిక శక్తిలా అనిపించాడని చెప్పారు. ముఖ్యంగా థ్రిల్లర్ పాటలోని డ్యాన్స్, ప్రెజెంటేషన్, స్క్రీన్ ప్రెజెన్స్ తన ప్రపంచాన్ని పూర్తిగా మార్చేశాయని తెలిపారు.
ఆ రోజు తర్వాత తన సినీ ప్రయాణంలో మైఖేల్ జాక్సన్ పాటలే ఒక కొలమానంగా మారిపోయాయని ఆర్జీవీ పేర్కొన్నారు. బీట్ ఇట్, బిల్లీ జీన్, స్మూత్ క్రిమినల్ వంటి పాటల వీడియోలను తాను, తన టీమ్ పదే పదే చర్చించుకునేవాళ్లమని వెల్లడించారు. జాక్సన్పై వచ్చిన వివాదాలు తనను ఎప్పుడూ ప్రభావితం చేయలేదని.. ఎందుకంటే ఆయన కళ తన ఆత్మను తాకిందని చెప్పారు.
అయితే 2009 జూన్ 25న వచ్చిన ఒక వార్త తనను పూర్తిగా కుదిపేసిందని వర్మ గుర్తుచేసుకున్నారు. “మైఖేల్ జాక్సన్ చనిపోయాడు” అనే బ్రేకింగ్ న్యూస్ చూసిన క్షణంలో అది నిజం కాదని అనుకున్నానని.. కానీ అన్ని ఛానెల్స్ అదే వార్తను ప్రసారం చేయడంతో తన భ్రమలు ఒక్కసారిగా పగిలిపోయాయని తెలిపారు.
“మైఖేల్ జాక్సన్ కూడా మామూలు మనిషేనని.. ఆయనకూ రక్తం, శ్వాస అవసరమయ్యాయని తెలిసిన రోజు నా ఫాంటసీ చనిపోయింది. నా కలలను పీడకలగా మార్చి ఆయన నన్ను వెన్నుపోటు పొడిచాడు” అంటూ ఆర్జీవీ వ్యంగ్యంగా, భావోద్వేగంగా రాసుకొచ్చారు.
చివరగా.. “మైఖేల్ ఇప్పుడు ఏ లోకంలో ఉన్నా అక్కడ కూడా గెలాక్సీల మధ్య మూన్వాక్ చేస్తూ నక్షత్రాలను మైమరపింపజేస్తూనే ఉంటాడు” అంటూ ఆయన తన అభిమానాన్ని మరోసారి వ్యక్తం చేశారు. విజయవాడలోని ఆ చిన్న వీడియో పార్లర్లో మొదలైన ఆ మైఖేల్ మాయాజాలం.. తాను చనిపోయే వరకు తనలోనే ఉంటుందని వర్మ భావోద్వేగంగా ముగించారు.
I HATE MICHAEL
After watching MICHAEL film , my memory went back to that horrible day June 25 th , 2009 when I slept late with the television still murmuring like a ghost in the darkness of my room , and as I groggily woke up in the morning and my eyes went to the screen to see…
— Ram Gopal Varma (@RGVzoomin) May 22, 2026
Recent Random Post:
