బాలీవుడ్లో సైఫ్ అలీ ఖాన్, దీపికా పదుకొణె, డయానా పెంటీ ప్రధాన పాత్రల్లో తెరకెక్కిన రొమాంటిక్ డ్రామా కాక్టెయిల్ అప్పట్లో భారీ విజయాన్ని సాధించిన విషయం తెలిసిందే. యూత్ను విశేషంగా ఆకట్టుకున్న ఈ సినిమా, ముఖ్యంగా దీపికా పోషించిన వెరోనికా పాత్రతో ఆమె కెరీర్లోనే మైలురాయిగా నిలిచింది.
అయితే ఈ పాత్ర కారణంగానే ఇద్దరు స్టార్ హీరోలు ఈ ప్రాజెక్ట్ను రిజెక్ట్ చేసిన విషయం ఆలస్యంగా వెలుగులోకి వచ్చింది. ఈ విషయాన్ని స్వయంగా సైఫ్ అలీ ఖాన్ వెల్లడించారు.
సైఫ్ తెలిపిన వివరాల ప్రకారం, మొదటగా హీరో గౌతమ్ పాత్ర కోసం రణబీర్ కపూర్, ఇమ్రాన్ ఖాన్లను సంప్రదించారట. కథ విన్న తర్వాత ఇద్దరూ సినిమాను చేయడానికి నిరాకరించారు. దీనికి ప్రధాన కారణం దీపికా పాత్రకే ఎక్కువ ప్రాధాన్యం ఉండటమేనని తెలుస్తోంది. కథ మొత్తం వెరోనికా చుట్టూనే తిరుగుతుందని, హీరో పాత్రకు తక్కువ స్క్రీన్ స్పేస్ ఉంటుందని భావించడంతో వారు వెనక్కి తగ్గినట్లు సమాచారం.
దీంతో సైఫ్ అలీ ఖాన్ స్వయంగా ఆ పాత్రలో నటించేందుకు ముందుకొచ్చారు. నిర్మాతగా కూడా ఉన్న ఆయన కథకు అనుగుణంగా ఆ పాత్రను స్వీకరించారు. సినిమా విడుదలైన తర్వాత సైఫ్ నటనకు మంచి ప్రశంసలు లభించాయి.
అయితే కథలో ప్రధాన ఆకర్షణ మాత్రం దీపికా పదుకొణె పాత్రే కావడం విశేషం. ప్రేమ, స్నేహం, భావోద్వేగాల మేళవింపుతో ఆమె పాత్ర ప్రేక్షకులను ఎంతగానో ఆకట్టుకుంది. ఈ సినిమాతో దీపికా బాలీవుడ్లో మరింత బిజీగా మారింది.
ఇక ఈ సినిమాకు సీక్వెల్గా ఇటీవలే కాక్టెయిల్ 2 విడుదలైంది. ఇందులో షాహిద్ కపూర్, కృతి సనన్, రష్మిక మందన్న నటించినప్పటికీ, ఆశించిన స్థాయిలో విజయాన్ని అందుకోలేకపోయింది.
Recent Random Post:
